1. Ez erabili sare publikoak

Etxetik kanpo denbora gehiago pasatzen dugunez, askotan wifi-sare publikoak aurkitzen ditugu hoteletan, jatetxeetan edo aireportuetan, eta gure mugikorra horiekin konektatzeko premia senti dezakegu. Baina horrelakoek datuak aurrezteko balioko badigute ere, ez dira batere seguruak, eta zibergaizkileek oso gogoko dituzte. Hobe da halakorik ez erabiltzea –bereziki transakzioak egiteko– eta gure konexioa zifratuko duen VPN bat erabiltzea.

2. Ez nahasi posta elektroniko pertsonala eta korporatiboa

Kontuz ibili gai pertsonaletarako laneko posta elektronikoa erabiltzen baduzu. Horrek atea ireki diezaieke zibersegurtasun-arazo serioei, esteka gaiztoak edo erantsitako artxiboak izan baititzakete, irekiz gero enpresa-sare osoaren segurtasuna arriskuan jar dezaketenak. Gainera, posta korporatiboan gailu ez-seguruetatik edo sare publikoetatik sartzeak areagotu egiten du zibererasoak jasateko arriskua.

3. Kudeatu pasahitzak

Zure segurtasun digitala indartzeko, funtsezkoa da pasahitzak ondo kudeatzea. Erabili pasahitz seguruak eta bakarrak kontu bakoitzerako, eta pentsatu pasahitz-kudeatzaileak erabiltzea. Pasahitz sendoak sortzeko metodo eraginkor bat letren, zenbakien eta karaktere berezien konbinazio bat erabiltzea da.

4. Kontuz ibili AA erremintetan datuak ez filtratzeko

ChatGPT, Google Gemini eta datorren Apple Intelligence plataformak, besteak beste, oso erabilgarriak dira lan egiteko, oporrak antolatzeko eta beste zeregin batzuetarako. Baina ez ahaztu kontu handiz ibili behar dela: ez dugu erreminta horiekin informazio pribatua partekatu behar. Oraindik ez dakigu enpresa horiek zer egingo duten informazio horrekin. Bestela, gogoratu Worldcoin konpainiaren kasua: mundu osoko jende ugariren irisa eskaneatu du, eta duela gutxi bere lana geldiarazi behar izan du Espainian pribatutasun-arazoak direla-eta.

5. Zaindu zure sare sozialak

Oporretan gaudenean urrats bakoitza sare sozialetan partekatzen badugu, arrisku handiagoa izango dugu ziberdelituak jasateko. Zeure burua babesteko, doitu pribatutasunaren konfigurazioa, ez partekatu kokapenak denbora errealean, eta kontuz ibili argitaratzen dituzun argazkiekin. Gomendagarria da zure gailuetako geolokalizazioa desaktibatzea eta zure kontu guztietan bi faktoreko autentifikazioa aktibatzea.

6. Softwarea eta ioT

Aurreko 5 puntuez gain, badira beste aholku garrantzitsu batzuk ere, hala nola zure gailu guztietako softwarea eguneratuta edukitzea. Kontu handia izan, era berean, oporretarako ostatuaren alokairua kontratatzean: ez fidatu https ez darabilten edo behar bezala identifikatuta ez dauden webguneez.  Alokairu-plataformak erabiltzen badituzu: kontuz ibili informazio pertsonala partekatzean, plataforma horien barruan ere iruzurrak daude-eta! Eta ziurtatu beti ostatuaren segurtasuna egiaztatzen duzula.

Azkenik, utzi etxea babestuta: IoT gailuak baditu, ziurtatu pasahitz sendoekin babesten dituzula eta firmwarea eguneratuta daukazula.

Azken finean, segurtasunez bidaiatu eta espero dugu aholku hauei esker opor lasai eta ziberseguruez gozatu ahal izango duzula. LAGUN AROren gure etxe-aseguruaren barruan, ETXEBIZITZA DIGITALAren estaldura eskaintzen dizugu, urruneko laguntza informatikoarekin eta babes digitalarekin. Azkenik, edozein zalantza baduzu edo iruzurren bat dela-eta urgentziazko laguntza behar baduzu, jar zaitez harremanetan INCIBEren (Zibersegurtasuneko Institutu Nazionalaren) laguntzarekin eta bertako arreta-kanalekin:

The post Zibersegurtasuna oporretan: uda honetan babestuta egoteko aholkuak appeared first on Blog de actualidad.

Zer da aparkatzea?

Aparkatzeak “ibilgailua denbora batez gelditzea” esan nahi du, eta horretarako beharrezkoa da egiaztatzea aparkatzea debekatzeko seinalerik ez dagoela eta Zirkulazioko Erregelamendu Orokorra jarraitzea, beste edozein ibilgailuren kasuan bezala.  Alde horretatik, ibilgailu bat aparkatutakotzat jotzen da horretarako mugatutako espazio bat okupatzen ari denean, baina leku horren mugetatik irten gabe. Beraz, logikoki, ezin izango zara autokarabanarekin gelditu bigarren ilaran, kurba batean edo pasabide batean, bestelako ibilgailuekin bezalaxe.

Non eman dezaket gaua?

Gaua emateak esan nahi du “gauez aparkatzea eta lo egitea zure ibilgailuaren edo autokarabanaren barruan”. Behar bezala aparkatu baduzu eta lo egin nahi duzun zonan dauden lege-araudi guztiak betetzen badituzu, gaua eman ahal izango duzu bertan. Kontuan izan debekatuta dagoela itsasotik gertu edo naturagune babestuen barruan aparkatzea; gune bakoitzeko seinaleei erreparatu beharko diezu. Gero eta zona pribatu gehiago daude gure autokarabanan kanpatuta gaua eman ahal izateko. Hainbat webgunetan aurkituko duzu informazio hori, eta ezinbestekoa da bidaia prestatzeko. Adibide on bat aurkitu dugu zure karabanarekin lo egiteko areekin, baina seguru Interneten askoz gehiago aurkituko dituzula!  

Kanpatzea vs. gaua ematea

Ia edozein lekutan eman daiteke gaua, baina ez da kanpatzearen gauza bera, toldo bat edo kanpin-etxe bat muntatzea eta kanpineko mahaiak edo aulkiak ateratzea eskatzen baitu horrek. Kanpinerako eremu esklusiboetan bakarrik kanpa daiteke, publikoak nahiz pribatuak izan.

Iaz, Kanpineko Enpresarien Espainiako Federazioak (FEEC) legearen erreforma eskatu zuen kanpin-eremuetatik kanpo karabanan gaua ematea debekatzeko, baina legea oraindik ez da aldatu. Federazioaren proposamenaren arabera, kanpineko enpresariek kudeatutako eremuak erabili beharko lirateke karabana, autokarabana eta camper furgonetetan gaua emateko. Oraingoz, aparkatzea baimenduta dagoen lekuetan gaua eman ahal izango duzu.

Gurpilen gainean oporretara joateko asmoa duzu? Prestatu udako opor-bidaia autokarabanan, eta ezagutu horrelako abenturetarako helmugarik onenak.

The post Nik nahi dudan lekuan lo egin dezaket karabanarekin? appeared first on Blog de actualidad.

 Ahal den guztietan, karga maletategira

Ibilgailuaren karga maletategian kargatu behar da ahal bada, beti goiko erretilua errespetatuz. Leku gehiago behar baduzu, ken daiteke, baina gogoan izan ez dela gomendatzen gidariaren atzealdeko ikuspegia buxatuta dagoela gidatzea; edonola ere, hala eginez gero, nahitaezkoa da ezkerreko ispilu bat edukitzea. Gainera, erretilua kenduz gero, kargari ondo eutsi behar zaio, istripua edo bat-bateko maniobra bat gertatuz gero karga oso azkar ateratzea saihesteko. Horregatik, gomendioetako bat da atzeko eserlekuaren eta maletategiaren artean banatze-sare bat erabiltzea.

Gehien pisatzen duten objektuak, tamaina edozein dela ere, maletategiaren hondoan jarri behar dira; izan ere, 14. artikuluaren arabera, karga “ibilgailuaren egonkortasuna arriskuan jarriko ez duen moduan” banatu behar da. 

Ibilgailuaren barruko kargaren kasua

Beti ez da posible izaten dena maletategian kargatzea: batzuetan, objektu handiagoak bidaiari-tokiaren barruan kargatu behar izaten ditugu. Kasu honetan, karga leku seguru eta babestu batean jarri behar da, bat-bateko maniobra edo istripua gertatuz gero arriskutsua izan ez dadin. Kargak ez du inoiz ibilgailuaren egonkortasuna arriskuan jarri behar, eta barruan ondo banatuta egon behar du. Era berean, ez du zaratarik edo eragozpenik sortu behar, eta ez du ibilgailua gidatzea zaildu behar.

Azken aukera gisa, karga ibilgailuaren kanpoaldean 

Azken baliabide gisa, karga ibilgailuaren kanpoaldean eraman daiteke, normalean sabaian edo ibilgailuaren atzealdean. Kasu horretan, kontuan izan behar da kargak ezin dituela estali ibilgailuaren argiak zein matrikula, eta ezin dela irten ibilgailuaren planotik, inguruabar eta baldintza berezietan izan ezik. Gainera, kargak erabat lotuta egon behar du, erortzea eta errepidearen beste erabiltzaile batzuentzat arriskutsua izatea saihesteko.

Salgaiak garraiatzeko ez diren ibilgailuetan, araudiak ezartzen du karga atzealdetik % 10 arte irten daitekeela, edo % 15 arte zatitu ezin bada. Nolanahi ere, irtenez gero, gidariek V-20 seinale batekin seinaleztatu behar dute, gainerako gidari eta erabiltzaileak ohartarazteko.

Zenbatekoa da karga gaizki eramateagatiko isuna? 

Trafikoari, Ibilgailu Motordunen Zirkulazioari eta Bide Segurtasunari buruzko Legearen arabera, arau-hauste larria da “ibilgailu bat gidatzea karga gaizki egokituta dagoela edota erortzeko arriskua duela”. Beraz, isuna 200 €-koa izango da. 30

Ba al du eraginik aseguruan karga gaizki eramateak? 

Horrez gain, automobil-aseguruek ez dituzte estaltzen ez-betetzeetatik eratorritako ondorioak indarrean dagoen legeria betetzen ez denean pisuari, kargaren neurriari eta garraiatzen den moduari dagokienez; horiek izaten dira, hain zuzen ere, istripu-arrazoi erabakigarriak.

The post Zure autoko kargak eta objektuak kudeatzeko aholkuak appeared first on Blog de actualidad.

Udako gure etenaldiak ez zaituzte harrituko sare sozialetan jarraitzen gaituzuenoi edo gure buletinera harpidetuta zaudetenoi. Seguros Lagun Aron normala izaten da abuztuan arnasa hartzea irailean gai berriak ekartzeko.

Aurtengo berrikuntza da autokarabanaz goazela oporretan. Nolanahi ere, lantaldekoren batek zerbait praktikoagoa eta dinamikoagoa nahiago du, eta camper-a aukeratu du bidaiatzeko. Uda honetan, modan jarri dira autokarabanak eta camper furgonetak bidaiatzeko ibilgailu gisa.

Oporrak gurpilen gainean

Jende askok hautatzen du bidaiatzeko modu hau. Beraz, aurten mugitzeko askatasuna eta etxea gainean dugula bidaiatzeko erosotasuna probatuko ditugu. Esaten dute autokarabanan bidaiatzeak adikzioa sortzen duela.

Aurten, gainera, oso aukera egokia da, aukera ematen duelako bidaiak eta ihesaldiak antolatzeko hilabete batzuk lehenago erreserbatu beharrik gabe. Gainera, autokarabana ingurune babestua da, ia autosufizientea, eta desinfektatzen erraza familiarekin nahiz lagunekin segurtasunez bidaiatzeko.

Aholku ugari aurkitu ditugu Interneten caravaningaren munduan hasteko. Lehenengo zalantza hau izan dugu: nola aseguratu behar dugu autokarabana?

Nahitaezko asegurua autokarabanetarako eta camper-etarako

Normalean, halako ibilgailuek ohikoek baino estaldura handiagoak behar izaten dituzte. Gauza bera gertatzen da furgoneten edo camper-en kasuan. Barneko ekipamenduak aseguru-modalitate espezifikoa behar du. Kontuan hartu aseguruak estaldu beharreko osagai gehiago daudela ibilgailu normaletan baino: tresna elektrikoak, ateak eta leihoak, sanitarioak, instalazio elektrikoak, sukaldea…

Eta aseguru-etxe guztiek ez dute horietara egokitutako produkturik. Esate baterako, Seguros Lagun Arok etxebizitza-furgoiak bakarrik (VW California, Mercedes Marco Polo…) aseguratzen zituen orain arte, Arrisku Orotakoaren estalduren bidez. Baina jarraitu irakurtzen, hau aldatu egingo da-eta.

Lagun Aroren aseguru berria autokarabanetarako eta camper-etarako

Hemendik aurrera, Seguros Lagun Arok aseguru espezifikoa eskainiko du autokarabanetarako. Izan ere, halako ibilgailuetarako behar diren estaldurak dituen auto-asegurua da.

• Camper-furgoiak: Fabrikatik atera ondoren etxebizitzen elementuak –ohea, sukaldea…– gehitu zaizkien furgoiak dira.
• Camper-ak: Karrozeria-enpresa espezializatuek egokitutako furgoiak: etxebizitzen elementu propioak gehitzen dituzten kanpo- eta barne-aldaketak dituzte.
• Autokarabanak: Furgoi baten txasisa eta kabina bakarrik –edo txasisa bakarrik– erabiltzen dituzten ibilgailuak. Karrozeria-enpresa espezializatu batek bidaiari-toki bat gehitu die, eta barnean etxebizitzen elementu propioak jarri dira. Hainbat mota daude konfigurazioaren arabera: kaputxinoak, profilatuak, modularrak edo integralak.

Lagun Aroren caravaning aseguru berriari buruz informatzeko, galdetu zure ohiko artekaritzan edo LABORAL Kutxako hurbileko bulegoan. Bestela, deitu 944 94 74 28 telefonora, eta camper-etarako nahiz autokarabanetarako dauzkagun aseguru-modalitateak eta estaldurak azalduko dizkizute.

Autokarabana bat alokatzeko aukera

Nolanahi ere, ez da beharrezkoa autokarabana erostea halakoetan bidaiatzeko esperientzia bizi ahal izateko. Alokatzeko aukera dago, Yescapa.es, webgunean, esate baterako: partikularren artean autokarabanak eta camper furgoiak alokatzeko webgunea da. Aukeratu 7.500 ibilgailu baino baino ibilgailu gehiagoren artean (1.000 baino gehiago Espainian), eta bidaiatu askatasun osoz.

Gorabeheraren bat izanez gero, pertsonalizatutako arrisku orotako aseguru batek bidaia osoan zehar babestuko zaitu, eta errepideko laguntza izango duzu, gainera, asteko 7 egunetako 24 orduetan. Lapurretak ere estalita daude, bai errentariak eta bai jabeak lasaitasun osoz aloka ahal izan dezaten.

Eta badakigu zertaz ari garen, duela urte batzuk geroztik Seguros Lagun Aro eta Yescapa elkarrekin lankidetzan ari direlako partikularren arteko autokarabana- eta camper-alokairurako bereziki sortutako aseguru bat eskaintzeko. Aldi baterako asegurua da, eta jabearen urteko asegurua ordezten du alokairu-aldi bakoitzean. Bai bidaiariak eta bai ibilgailua aseguratuta daude alokairu-aldian zehar, eta inolako administrazio-kudeaketarik egin beharrik izan gabe.

Helmuga turistikoak prest, adi, irten!

Helmuga turistiko ugari konfinamenduaren ondorengo turismoa bultzatzeko  prestatu dira (koronabirusaren ondorengo turismoaz hitz egin nahiko genuke, baina zoritxarrez birusa oraindik hor dago eta alerta jarraitu behar dugu).

Helmuga gehienek barne-turismoa bultzatu nahi izan dute gehienbat, eta autokarabanak moldaerrazak eta erosoak direnez, aurten caravaningaren joera goraka dator. Furgonetan bidaiatzea gero eta zabalduago dago Europa osoan.

Guk Espainiako Autonomia Erkidego ugarik barne-turismoa erakartzeko egin dituzten bideoak erakutsi nahi dizkizuegu. Zure helmuga izan ala ez, erreproduzitu bideoak eta gozatu eskaintzen dizkiguten irudiekin. Ikuste hutsarekin gozatu egingo duzu! Paisaiak ikusi, herriak gogoratu, gastronomia dastatu… gu zoratu egin gaituzte!

Euskadin elkarrekin topatzeko patua

Helmuga ez da leku hutsa. Gauzak ikusteko, sentitzeko eta bizitzeko aukera berria ere bada. Euskadik horretarako aukera ematen du, eta 40 segundotan biltzen ditu musika, off ahotsa eta paisaia ikusgarriak.

Nafarroa eta bere “efektuak” zain dauzkazu

Guk abentura hautatu dugu, baina askoz ere gehiago daude. Klik eginez gero, “Nafarroa efektua” ezagutu ahal izango duzu.

Andaluziak ikusi nahi zaitu

Gata lurmuturrak ikusi nahi zaitu, Alhambrak zure falta du, Torcal zure zain dago, eta Doñanak zurekin egiten du amets… sakatu play, eta esaiezu zerbait.

Kantabria, beti bezain mugagabe

Une zailak igaro ondoren, Kantabriak proposatzen dizu munduan zure lekua aurkitzea.

Asturias, hondartzako lehen lerroan

Asturiasko paradisu naturala, itsasora irekia Eta gogoratzen dizute Printzerriak 200 hondartza baino gehiago dituela, gustu guztietarako.

Galizia Benedictaren eskutik

Galiziaren turismoa sustatzeko kanpainak protagonista berezia du: Benedicta Sánchez, aurtengo aktore berri onenaren Goya sariaren irabazlea.

Gaztela eta Leon, Leo Harlemen inspirazioa

Erkidegoaren neurriko kanpaina: zerbait ezohikoa. Hala dio behintzat Leo Harlemek: berak, behintzat, Gaztela eta Leongo probintzia guztiak ezagutu nahi ditu uda honetan.

Gaztela-Mantxa, inoiz baino gertuago

Gaztela-Mantxako lurrek beren natura sentitzera eta bertako gastronomia dastatzera gonbidatu nahi zaituzte.

Ezagutu Valentziako Erkidegoko iparraldea eta hegoaldea

Gogoratu: bidaia handiak ez dira kilometrotan neurtzen. Aurtengoa uda handia igaro dezakezu Valentziako Erkidegoan.

Re-Murcia

Konturatu zara berriro egin nahi ditugun gauzei askotan RE jartzen diegula aurretik? Entzun zer esaten dizuten Murtziatik.

Katalunia zure etxea da

Oporretan autokarabana zure etxea bada, Katalunia zure bigarren etxea izango da. Bost zentzumenek eskertuko dizute.

Madril, hiriburutik mendira

Ez da Toscana ez Oihan Beltza. Beste nonbait zaudela irudituko zaizu, baina Madrilgo Erkidegoa da.

Extremaduraren ustekabea

Asko gustatu zaigu Extremaduraren spota. 3 minutu ditu: merezi du.

Aragoiko uda

Aragoiko uda beti desberdina izan da: lasaia, gertukoa, segurua eta familiartekoa. Dena aldatu den honetan, betiko uda bat bizitzera gonbidatzen zaituzte.

Errioxara bueltan

Erreserba handi hau helmuga turistikoen zerrenda bukatzeko utzi dugu: Errioxa, xarma turistikoz betetako 5.000 km2. Guk natura eta mendia aukeratu ditugu.

The post Topaketa-oporrak, autokarabanan appeared first on Blog de actualidad.

Maletak egiteko app-a

Denbora gehiago behar baduzu maleta egiteko Eraztunen Jaunaren luxuzko edizioa ikusteko baino (15 disko!), ez zaizkizu eraztunak galduko bi aplikazio hauek erabiltzen badituzu

Ez, aplikazioek ez dizkizute maletak egingo, baina bidaia-zerrenda antolatzen lagundu bai, egingo duzun bidaia-mota kontuan hartuta. Biak doakoak dira, eta erabilgarri daude Android eta iOS-erako.

PackKing

Aplikazio honek esango dizu zer ez duzun utzi behar maletan sartu gabe. Esaiozu nora zoazen, noiz, zer eguraldi egingo duen eta zer plan egin nahi dituzun eta… voilà!, bidaia-zerrenda eginda batere zoratu gabe.

PackKing erabilgarri dago Google Playn Androiderako (oso balorazio onarekin) eta App Storen iOS-erako.

PackPoint

PackPoint-ek eraman beharreko gauzen zerrenda egingo dizu; gainera, kontuan hartuko du oinarrizko jantziak –kamisetak, galtzak…– errepikatzea axola zaizun ala ez eta ikuztegiren bat hurbil duzun ala ez, esate baterako.

PackPoint-ek doako nahiz ordainpeko bertsioak ditu. Biak erabilgarri daude Google Playn eta App Storen, eta 5etik 4,6 izarrekin baloratu dituzte.

Inguruko zerbitzu interesgarriak bilatzea

AroundMe

Oso erabilgarria da ezagutzen ez zenuen leku batera joanez gero nahiz ohiko oporlekuan zerbitzu berriak deskubritu nahi izanez gero. GPS bidez, AroundMe aplikazioak inguruko lekurik interesgarri eta baliagarrienak ezagutzeko aukera emango dizu: tabernak, bankuak, farmaziak, kutxazain automatikoak, monumentuak…

Interesatzen zaizkizun zerbitzuen kategoria hautatu, eta non dauden esango dizu, “azkar, erraz eta zehatz” haiek diotenez. Hori bai, Marco erabiltzaileak dioen bezala: “lekuak aurkitzeko aplikazio onena da, baina ez dizu esango non dagoen zure laranja-erdia edo benetako zoriontasuna”.

AroundMe-ren erabiltzaileek 4 izar baino gehiagorekin baloratu dute aplikazioa, eta deskargagarri dago Androiderako Google Playn eta iOS-erako App Storen.

Chiringuía

Izenak dena esaten du: hondartzako txiringitoak biziki maite dituztenentzako app-a da. Chiringuía-k “hondartza bakoitzeko onena” geolokalizatzen du, hau da, Espainiako kostaldeko txiringitoak. Beste erabiltzaile batzuen iritziak eskaintzen ditu, baita janariari, edariari, jarduerei edo ekitaldiei buruzko informazioa ere, zuretzat pertsonalizatuak diren ibilbideak sortu ahal izateko.

Doakoa da, eta erabilgarri dago Androiderako eta iOS-erako App Storen.

Gauzatxo bat. Chiringuía-k gogobetetzen ez bazaitu, probatu Chiringuiteros aplikazioa. Leku gehiago hartzen du mugikorreko memorian, baina diotenez “Espainiako txiringito (ia) GUZTIAK dauzka”. Nolanahi ere, bi aplikazioak onenak emanda daudela dirudi eguneratzeei dagokienez

Komunak mugikor bidez bilatzea

Flush

Komun publikoak bilatzen dituen aplikazio honek estutasun batetik baino gehiagotatik aterako zaitu uda honetan. Erabiltzaileen iritziak eta argazkiak ditu, “tronurik” gogoko eta erosoena hautatu ahal izan dezazun.

Aukeratutako gainerako aplikazioak bezalaxe, Flush doakoa da eta erabilgarri dago Androiderako eta iOS-erako App Storen. Balorazioei dagokienez, iPhone-ren erabiltzaileek hobeto baloratu dute (4 izar baino gehiago) Androideko erabiltzaileek baino.

Beharra daukat!

Nork esan du komun bila ibiltzea ez dela larrialdi bat? Gogoratu komunera arazo medikoak dituztelako urgentziaz joan behar dutenekin, esate baterako.

Crohn eta Ultzeradun Kolitisaren Gaixoen Elkartearen “Beharra Daukat/Lo necesito ya” proiektuak laguntza eman nahi die arazo medikoak –ez kutsakorrak– dituztelako komunera urgentziaz joan behar duten gaixoei.

Komunen mapa kontsultagai dago haien Androiderako appean nahiz beharradaukat.eus webgunean, eta edozein establezimendu atxiki dakioke.

Proiektura atxikitako eraikin instituzionalek, entitateek, saltokiek eta bestelako erakundeek identifikazio-txartela duten gaixoen eskura jarritako komunak –publikoak nahiz pribatuak– lokalizatzen ditu.

Komunen mapa kontsultagai dago appean nahiz haien webgunean.

Azala eguzkiarekin kaltetzea eragoztea

UV-Derma

Eguzkitan egoteko asmoa badugu, hondartzan, mendian nahiz etxeko balkoian, UV-Derma-k eguzki-esposizio luzeegiaren ondoriozko kalteak eragozten lagunduko digu.

Aholkuak emateaz gain, aplikazioak esango digu zenbat denboran erreko den gure azala eguzkia hartzerakoan, unean uneko indize ultramorearen eta gure fototipoan oinarritutako kalkuluen arabera; alegia, gure azalak zer gaitasun duen eguzki-erradiazioa asimilatzeko.

Malagako Unibertsitateko bi irakaslek diseinatu dute app-a, Espainiako Dermatologia Akademiaren Piel Sana Fundazioarekin lankidetzan, eta erabilgarri dago Google Play-n Androiderako eta App Store-n iOS-erako.

Nolanahi ere, kontuz: osasungarriena da eguzkitan gehiegi ez egotea eta eguzki-babesgarriak erabiltzea, lainotuta dagoen egunetan ere bai. Izan ere, ez dago modu osasungarrian beltzarantzerik.

The post Udarako 7 app, urte osoan erabiltzeko modukoak appeared first on Blog de actualidad.

Haurrekin bidaiatzeko musika

Ez da erraza pertsona askorekin bidaiatzen duzunean musika hautatzea, baina, pertsona horiek haurrak badira, are gehiago zailtzen da gauza. Oreka aurkitzean dago gakoa, baina baita txikienei eta guri gustatuko zaizkigun abestiak hautatzeko denbora hartzean ere. Bai, badakigu hain zuzen ere denbora falta ohi zaigula. Hori dela-eta, Spotify-ko zenbait zerrenda hautatu ditugu, bidaia atseginagoa izan dadin, eta, bereziki, haurrak entretenituta egon daitezen bidaiaren zati handi batean:

Sing Along: ingelesezko abestiak ia bi orduz, tartean Disney-ren “Under the Sea”.

Jolasteko eta abesteko musika: 54 abesti tarte luze batez jolasteko eta abesteko

Family Road Trip: abestu familian errepideko bidaietako 62 klasikorekin

Lagunekin abestea

Baina lagunekin bazoaz bidaian eta gustuko baduzue arnasa betean abestea, hona hemen ingelesezko eta gaztelaniazko abesti onenen zerrenda batzuk. Berehala joango zaizue denbora iraganeko, oraingo eta etorkizuneko abestiak entzuten dituzuen bitartean:

Songs to sing in the car: 3 milioi eta erdi jarraitzaile baino gehiago dituen zerrenda, 5 ordu eta erdiz musika entzuteko

Cantar en el coche: Fito, Maldita Nerea, Celtas Cortos, Amaral, Bongo Botrako, Morat… Zerrenda “txikia” da… 13 ordukoa!

Zeure kasa abestea

Aldiz, bakarrik bidaiatzeko asmoa baduzu, bide osoan lagun egingo dizun zerrenda ezin hobea aurkitzea da onena. Hori dela-eta, lurretik, itsasotik nahiz airetik zoazela bidaia atsegin bihurtuko dizuten musika-estilo desberdinetako abestiak eta arrakasta nazional eta nazioartekoak proposatzen dizkizugu.

¿Te gusta conducir?: Izhanen abesti gogokoenak, “pentsatu nahi duzunerako, hodeitsu dagoenerako edo errepidean zoazenerako”

Voyage en avión: erreprodukzio-zerrenda lasaigarria, eta zen puntu bat duena, hegazkinean zoazenean lo egin ahal izateko

Classic road trip songs: Johnny Cash, Bruce Springsteen, Van Halen, The Doors… Klasiko handiak gidatzen ari zarenerako

Euskaraz eta katalanez bidaiatzea

Euskarazko abestiez osatutako erreprodukzio-zerrendak ere aurkitu ditugu, urrun bidaiatzen dutenek herria hurbil senti dezaten. Hainbat talderen abesti bikainak ditu (adibidez, Vendetta, Gatibu…), bidaia atseginagoa izan dadin:

Euskera: euskarazko eta gaztelaniazko abestiak aurkituko dituzu 154 abesti hauen artean

Nora kotxea: ezin hobea bidaia laburrak egiten dituzunean edo haurrekin bidaiatzen duzunean

Katalanezko erreprodukzio-zerrendak ere badaude, runba katalanaz eta uneko abesti entzunenez gozatzeko; horrela, laburragoa egingo zaizu bidaia:

Rumba catalana: runba katalana eta katalanezko abesti ugari hainbat orduz

Musika katalaneko Top 100 zerrenda: La Pegatina, Els Catarres, Manel… 121 abestiz osatutako Top 100 zerrenda batean!

Atseden hartzeko eta erlaxatzeko bonus track

Eta, amaitzeko, udak eta oporrak atseden hartzeko eta erlaxatzeko ere badira. Horregatik, abesti instrumentalak, baladak eta chill abestiak konbinatzen dituzten erreprodukzio-zerrenda batzuk eskaintzen dizkizugu, ezin hobeak indarrak hartzeko eta gozatzeko.

Relax & Unwind: jar zaitez hamakan, itxi begiak eta gozatu musika-hautapen honetaz

The post Play botoia sakatu eta gozatu oporrez appeared first on Blog de actualidad.

Automobilen Aseguru-etxeen Espainiako Bulegoak (OFESAUTO) urte batzuk daramatza nolabaiteko nahasmena antzematen, bai sektorean eta bai aseguratuen artean, atzerriko errepideetan ibiltzeko dokumentu horren derrigortasunari buruz. Kasu gehienetan, zalantza horiek aseguru-etxeek beraien aseguratuei dokumentu hori ematen jarraitzeko ohiturak sortzen dituzte edo bezeroek eskatzen dutelako sortzen dira. Karta Berdea eramatea nahitaezkoa ez den arren, Seguros Lagun Arok eramaten jarraitzeko gomendioa egiten du, ez delako ezer kostatzen eta atzerriko errepideetan izan ditzakezun arazoen aurrean lagungarri gerta dakizukeelako.

Zer da Karta Berdea?

Aldez aurretik ezarritako formatua eta hizkuntzak dituen nazioartean onartutako dokumentu estandarra da. Dokumentuak adierazten du automobil-asegurua duzula eta, errepidean arazoren bat izanez gero, atzerrian (Europako Esparru Ekonomikoko eta Berme Hitzarmen Multianiztunari atxikitako herrialdeetan) zabiltzala zure ibilgailuak eragindako istripuen biktimei gutxieneko aseguru-estaldura eskaintzen diela

II. Mundu Gerran sortu zen, ibilgailuen trafikoa areagotu zenean mugen arteko ibilgailuen zirkulazioa kudeatzeko eta bizkortzeko sistema bat ezartzea beharrezkoa egin zenean. Kontu hori Nazio Batuen Erakundeak planteatu zuen. Gaiari aurre egiteko irtenbide bakarra gomendatzea erabaki zuen, hain zuzen ere, 30eko hamarkadan iparraldeko herrialdeetan ezarritakoa. Gomendioa “Genevako gomendioak” deiturikoetan txertatu zen. Han sortu zen “Karta Berdearen Sistema” deiturikoa.

Karta Berdea, ez da nahitaezkoa baina bai gomendagarria

Automobilen aseguruari buruzko Batasuneko lehen eta bigarren Zuzentarauen ordenamenduaren transposizioaz geroztik, erantzukizun zibilaren estaldura, ordura arte Karta Berdeak estaltzen zuena, guztiz bermatuta geratu zen Europako Esparru Ekonomikoaren lurralde osoan eta hari atxikitako estatuetan, esaterako, Andorran, Suitzan eta Serbian. Beraz, nahikoa izango litzateke Espainian egindako aseguru-kontratua aurkeztea.

Gerta daiteke Europako zenbait herrialdetan, esaterako, Portugalen, Karta Berdea aseguru-estaldura egiaztatzen duen dokumentua izatea. Kasu horretan ibilgailu nazionalentzat soilik izango litzateke baliagarria eta aplikagarria, ez Batasuneko ibilgailu guztientzat baina, hala ere, ez litzateke gehiegizkoa izango Karta Berdea izatea.

Hauxe da arrazoi nagusia: asko errazten dituela izapideak aldez aurretik ezarritako formatua eta hizkuntzak dituen egiaztagiri “unibertsala” delako, eta ez zure jatorriko hizkuntzan idatzitako ordainagiria edo baldintza partikularrak. Horri gehitu behar zaio gidariek aseguruaren ordainagiria gordetegian ez sartzeko ohitura, Estatuan dabiltzanean trafiko-agintariek FIVAn (Ibilgailu Aseguratuen Fitxategi Informatiboa) sartzeko aukera dutelako dokumentazioa eskatu aurretik. Dokumentazioa eramatea bada nahitaezkoa.

Karta Berdea ez eramateak eskatzen du bidaiari hasiera eman baino lehen helmugako herrialdearen egoerari oso adi egotea. Zenbait herrialdek aseguruaren estalduran sartzeko edo handik irteteko aukera dute egonkortasunaren arabera. Estaldura eskaintzen duten herrialdeen zerrendatik kanpo utziko lituzke horrek. Herrialdeen zerrenda OFESAUTO erakundearen web-orrian aurki dezakezu.

Zein herrialdetan behar dut Karta Berdea?

Gaur egun, Karta Berdearen premia Europako Esparru Ekonomikotik kanpoko 14 herrialdetara mugatzen da. Hauek dira: Albania, Azerbaijan, Bosnia-Herzegovina, Bielorrusia, Israel, Iran, Maroko, Moldavia, Mazedonia, Tunisia, Turkia, Ukrainia, Errusia eta Montenegro.

Eta zeure buruari galdetuko diozu, zer egingo dut Europako Esparru Ekonomikokoa ez den eta Karta Berdeak balio ez duen herrialde batean banago? Ez kezkatu. Kasu horretan, herrialdera iritsi bezain laster mugako aseguru bat kontratatu ahal izango duzu, istripuren bat izanez gero erantzukizun zibileko aseguru gisa balioko dizuna.

The post Nahitaezkoa al da atzerrira Karta Berdea eramatea? appeared first on Blog de actualidad.

(1) Seguru sentiarazten gaituzten abestiak entzungo ditugu, (2) aire zabaleko zinemaren batera joango gara, (3) “GRU mi villano favorito” sagaren azken filmarekin barre egingo dugu, (4) 2016ko 50 komiki aipagarrien urtekariari begirada bat emango diogu, (5) udako kontakizunak eta eleberriak irakurriko ditugu (6) eta kafea izotzarekin hartuko dugu itzalean terrazaren batean.

Oporretako egun hauek lerro hauek idazten ditugunok gozatuko ditugu .Lagun Aroren Bezeroaren arretarako lantaldea hor izango duzu oraindik ere behar duzunerako. Espero dugu deitu behar ez izatea oporretara bidean autoak bide-bazterrean utzi zaituelako edo zure sukaldea azken unean urez bete delako; nolanahi ere, gure 944 94 74 28 telefonoan lagunduko dizugu, eguneko 24 orduetan eta asteko 7 egunetan. Laboral Kutxako bezeroek 901 100 200 telefonoa, lineako bankua eta mugikor bidezko bankua erabil ditzakete gurekin harremanetan jartzeko.

Jakin badakigunez une honetan maletategia kargatzeko zorian edo errepidean zaudela, artikulu batzuk hautatu ditugu data hauetan irakurtzeko:

• 5 aholku irteera-operaziorako
• Sasoiko pneumatikoak
• Gasolinan aurrezteko aholkuak
• Radar-detektagailuak, denak ez dira legezkoak
• Haurtxoen auto-aulkiak
• Bidaideak eta erantzukizun zibileko asegurua
• Zer eraman behar duzu nahitaez autoan?

Goza dezagun, beraz, egun hauetan, eta gogoratu gure inguruan badirela oporretan ere atsedenik hartzen ez dutenak: ama eta aitak (lehenak batez ere), etxeko lanen karga dutelako… eta inork baino atseden gehiago egitea merezi dute! Ondo pasa abuztuan… irailean itzuliko gara!

The post Oporretara goaz! appeared first on Blog de actualidad.

Oinutsik, kamisetarik gabe edo bikinian gidatzea ez da segurua

Oinutsik gidatzea gustatzen zaizu, kamisetarik gabe, bikinian… gaizki! Zirkulazioko Erregelamendu Orokorrak –erabilgarri dago DGTren webgunean– ez du espresuki debekatzen, baina esaten du gidariak ibilgailua kontrolatzeko moduan egon behar duela une oro, eta badirudi horrela jantzita ez dela segurtasuna bermatzen.

Kamiseta, blusa edo alkandora jantzi gabe ere ez duzu gidatu behar. Ez da itxura onarekin gidatzeko arau bat; arau horren helburua da, hain zuzen, istripu bat izanez gero uhalarekin edo airbagarekin egin ditzakezun zauriak eta urratuak saihestea.

Uhala jartzeko keinua ia erreflexuzko ekintza bat da gehienontzat bolantearen aurrean esertzen garenean. Hala ere, batzuek ez dute jartzen bidaia laburretan eta beroa egiten duenean. Halako norbait ezagutzen baduzu, gogoraraz iezaiozu datu hau: 45 km/h-ko abiaduran zirkulatuz uhalik gabe istripu bat edukitzea hirugarren pisu batetik erortzearen baliokidea da. Ziur pentsaraziko diola.

Beti, beti, haurrak beren eusteko sistemarekin

Altxa dezala eskua hondartzarako bidean helduz betetako auto bat helduen belaunen gainean haurrak direla ikusi ez duenak… Halako irudiak orain ere ikus ditzakegu, udan batez ere. Presaka ibiltzea, ibilgailua aldatzea; “eramango ditut nik txikiak, aulkiak eta janaria; osabak eraman dezala eguzkitakoa, amona eta lehengusu handiak…”

Horrela ez. Beti saihestu behar diren bi zuhurtziagabekeria dira: onartutako bidaideak baino gehiago eramatea eta txikiak beren aulkirik gabe. Deserosoa izateaz gainera, ibilgailuan doazenak arriskuan jartzen dituen ohitura txar bat da.

Adingabeen kasuan, are gehiago gainera. 150 cm baino gutxiago neurtzen duten haur guztiek beren aulkian joan behar dute, homologatutako euste-sistemarekin eta beren altueraren eta pisuaren arabera. Aukeratzeko garaian ondo etorriko zaizu aurrez ezagutzea autorako aulkien sailkapena, adinaren araberakoa.

Gidatzea gustatzen zaizu…. besoa leihotik aterata?

Iragarkietako irudi tipikoa da: eguraldi ona, auto berria eta besoa aterata, airea azalaren gainean sentitzeko. Eguzki eta hondartzako eguna izorra diezazukeen 80 euroko isun posible batez gainera, pentsa ezazu literalki besoa gal dezakezula autoa irauliz gero edo beste ibilgailu baten aurka talka eginez gero. Beti saihestu beharreko arriskua da. Gogoan izan, gainera, leihoa bera ibilgailuaren babes-elementu bat gehiago dela.

Kaskoa buruan ibili munduan

Bizitza ken diezazukeen zuhurtziagabekeria bat izateaz gainera, arau-hauste larria da eta 200 euro arteko isuna ekar diezazuke, eta 3 puntu gutxiagorekin utzi gidabaimena. Legeak ez du horretara behartzen motozikleta edo ziklomotorra gidatzen duena bakarrik, bazik eta bidaideak ere bai. Hau da, “pakete” gisa doanak ere kasko babeslea eraman beharra dauka.

1992an kaskoa eramateko betebeharra ezarri zenetik, kaskoa ez bada eramaten trafiko-agenteek motoa ibilgetzen dute, eta, gainera, motoa kendu eta gordailutu dezakete. Nahitaezkoa da euroguneko herrialde ia denetan, baina batez ere, beste ezeren gainetik, zure buruarentzako segururik onena da, traumatismo kranioentzefalikoaren arriskua murrizten duelako istripurik izanez gero.

Bizikletaz zirkulatzeak ere kaskoa eramateko betebeharra du: nahitaezkoa da 16 urtetik beherakoentzat eta txirrindulari guztientzat hiriarteko bideetan zirkulatzean.

Praktika txarrak gidatzean

Oporretara zoazela (edo itzultzen ari zarela) bidean bokata janez aurrera egitea erabaki duzu… Gogoan izan bolantearen aurrean jateak edo edateak mugatu egiten duela erreakzionatzeko gaitasuna eta mugimenduak ere mugatu egiten dituela. Horregatik, egin zure segurtasunaren alde eta gera zaitez hurbilen duzun gasolina-zerbitzugunean indarberritzeko, eta ondoren jarraitu bidaiarekin.

Bistakoa denez, ezin da GPSa manipulatuz joan, ezta whatsapp mezuak bidaliz ere. Bi praktika horiek efikazia kentzen diete gainerako zentzumenei, eta arriskuan jartzen dute gidatzeko prozesua. Gainera, arau-hauste larriak dira: 200 euroko isunak ekar ditzakete, eta 3 puntu kendu gidabaimenari. Hortaz, bidaiari ekin aurretik programatu beti GPSa edo utzi zeregin hori kopilotu on baten esku.

Batzuetan, praktika txar horiek benetan eragiten duten arriskuaren arrisku-pertzepzio txikiagoa izaten dugu errepidean gaudenean.

Beraz, uda izan arren eta oporretan egon arren, bolantearen aurrean jartzen bazara, zuhur jokatu eta pentsatu batez ere zure segurtasunean, inguruan dituzunen segurtasunean, eta, zergatik ez, zurekin errepidea partekatzen dugunon segurtasunean.

The post Oporrak erlaxatzeko dira, baina ez gidatzen ari garen bitartean appeared first on Blog de actualidad.

Izan ere, ezin uka dezakegu oporretan ohi baino gehiago eta beharrezkoa baino gehiago gastatzen dugunik. Erlaxatu egiten garela esango dugu: urtean behin, kalterik ez. Hala eta guztiz ere, oporretan aurrezten lagun diezazuketen truko batzuk gogorarazi nahi dizkizugu.

Egin bidaiaren erreserba aurrerapen oso handiarekin edo oso txikiarekin

Datak garbi badituzu, aurrerapen handiarekin erostea izaten da onena, garraioaren eta ostatuaren prezioak hobeak izaten baitira. Baina gauza bera gertatzen da azken unera arte itxaroten dugunean. Arrisku handiagoa du, baina pagotxak topa ditzakegu helburua eta plana argi ez baditugu, eskaintzak egongo baitira osatu beharrean dauden garraioetan eta ostatuetan.

Bilatu eta konparatu ostatu ekonomikoagoak

Prezioak konparatu behar dituzu bilatzaileetan, agentzietan…. Eta ekonomikoena hautatu. Etxe-trukea ere plantea dezakezu. Gero eta gehiago dira webguneen bidez etxeak trukatuz hiri desberdinak ezagutu nahi dituztenak, batez ere bidaia ekonomikoago irteten delako hotelaren kostua aurrezten delako.

Hotelen beste alternatiba batzuk dira apartamentuak, hostalak eta gazteentzako aterpetxeak. Aterpetxe batean ostatu hartzea familiarekin? Bai, hori ere posible da. Aterpetxeak egokiak dira 5 laguneko edo gehiagoko taldeentzat: lagunak, ikaskideak, familia… izan daitezke, eta, gazteentzako aterpetxe esaten zaien arren, ez daukate adin-mugarik. REAJen webgunea bisitatzea gomendatzen dizugu Espainiako aterpetxeak bilatzeko, edo Hostelling International mundu osokoak bilatu nahi badituzu!

Gogan izan are merkeagoa dela couchsurfing egitea, oso aukera aberasgarria besteen etxeetan ostatu hartzeko.

Aurreztu garraiotan eta janaritan

Behin oporretan zaudela, aukeratu garraio publikoa eta ahaztu taxia edo alokairuko autoak, beti izango baita aukerarik merkeena (hala ere, alokairua aukeratzen baduzu, alderdi hauek kontuan hartzea gomendatzen dizugu).

Baina garraioari dagokionez, turismo kolaboratiboa ere aukera dezakezu, eta autokarabana bat edo camper furgoneta bat alokatu partikularren artean, Yescapa plataforman (Europako liderra sektorean), esate baterako. Eta modurik seguruenean, Yescaparen aseguratzaileak baikara. Plataformako erabiltzaileei arrisku oroko asegurua eskaintzen diegu errepideko laguntzarekin Espainia osorako eta Europa osorako.

Informa zaitez garraio publikoko sareek izaten dituzten txartel turistikoez ere, deskontu interesgarriak izaten baitituzte, eta beste deskontu batzuk ere bai zenbait puntu interesgarritarako sarreran.

Aukeratu janari merkea —eta ez janari azkarra—, eta jan zure oporretako helburuko biztanleek jaten duten lekuetan. Ez zaitez erori lekurik turistikoenetara joateko tranpan. Janari edo mokadu batzuk ere eros ditzakezu tokiko supermerkatuetan.

Argi dago bidaiatzea ez dela merkea, baina ez da gauza bera dena agentzia baten esku uztea eta luxuzko bidaia bat kontratatzea eta gauzak norberak bilatzea, prezioak konparatzea eta helburuak eskaintzen dituen aukera ekonomikoenei buruz ikertzea. Denbora gehixeago pasatu beharko duzu, baina azkenean poltsikoak nabarituko du.

The post Oporrak eta aurreztea, bi hitz bateragarri appeared first on Blog de actualidad.