Izan ere, elurretako kateek balio dute segurtasuna eta mugikortasuna bermatzeko neguan gidatzen dugunean. Tenperatura asko jaisten denean eta errepidean izotza sortzen denean, gure bidaiderik onenak dira, berogailua eta GPSa bezain ezinbestekoak. Ibilgailuaren pneumatikoen inguruan jartzen dira, trakzio gehigarria izan dezaten. Gurpilen inguruan egokitzen diren kate-maila metalikoz edo material sintetiko erresistentez osatuta daude, lur irristakorrarekiko itsaspena hobetzeko. Halaber, lerradura murrizten laguntzen dute; eta ibilgailuek modu seguruagoan aurrera egiteko aukera ematen dute elurte handiak daudenean edo errepide izoztuetan.

Espainian, ez da nahitaezkoa ibilgailuan elurretako kateak eramatea neguan. Nolanahi ere, nahitaez eraman behar dira ibilgailuan baldin eta agintariek adierazi badute errepide jakin batzuetan erabili behar direla eguraldi txarraren ondorioz (elurte gogorretan edo izotza errepidean dagoenean, adibidez). Adierazpen horiek kartel espezifikoekin seinaleztatuta egoten dira errepide horietan; ez ikusi eginez gero, isunak egon daitezke. Gidariaren erantzukizuna da seinale horiei adi egotea eta kateak prestatuta edukitzea, eguraldiaren baldintzek hala eskatzen badute.

Trakzioaren arabera

Sistema hori erabiltzean, DGTk gomendatzen du 50 km/h-ko abiadura ez gainditzea. Komeni da abiadura murriztea segurtasun-baldintzetan zirkulatu arte, bidearen inguruabarretara eta eguraldiaren baldintzetara egokituz. Ez azeleratu edo frenatu bortizki. Kateak jartzeko, automobilaren motrizitatea hartu behar da kontuan:

• Aurreko trakziodun ibilgailua: aurreko ardatzeko gurpiletan jarri behar dira.
• Atzeko trakziodun ibilgailua: atzeko gurpiletan.
• Lau gurpileko trakzioa: lau pneumatikoetan.

Jartzeko jarraibideak

Kateak jartzen ohituta ez gaudenez, ez dakigu zenbat denbora beharko dugun; beraz, lehenik eta behin, geratu autoa leku lau eta seguru batean, espazioarekin eta ikuspen nahikoarekin. Seinaleztatu triangeluekin edo V-16 larrialdi-argiarekin, eta ez ahaztu txaleko islatzailea erabiltzea.

Kateak behar bezala jartzeko, jarraitu fabrikatzailearen gomendioak, urratsik saltatu gabe. Erabiltzeko beharra sortu aurretik, praktikatzea komeni da, pneumatikoen tamainari erabat egokitzen zaizkiola egiaztatzeko (kateen zehaztapenetan adierazten da pneumatikoen zer neurritarako balio duten). Erabili beti eskularruak, eskuetan ebakiak saihesteko eta hotzetik babesteko. Kateak jada behar ez direnean, kendu egin behar dituzu, pneumatikoak eta asfaltoa ez kaltetzeko.

Kate-motak

Elurretako kate-mota bat baino gehiago daude; beraz, zure beharretara ondoen egokitzen dena aukeratu behar duzu.

• Metalezko kateak: Ohikoenak dira, eta elkarrekin lotutako metalezko kate-mailaz eginda daude. Trakzio sendoa eskaintzen dute elur- eta izotz-baldintzetan; merkeak dira, baina zarata eta bibrazio gehiago sor ditzakete errepide garbian gidatzean.

• Ehunezko kateak: “Galtzerdiak” ere esaten zaie. Erresistentzia handiko polimeroak bezalako materialekin fabrikatuta daude; arinagoak dira, eta metalezkoak baino errazago instalatzen dira. Oso egokiak dira elurtutako errepideetako zati laburretan erabiltzeko, eta arrazoizko trakzioa eskaintzen dute. Horrelako kateen desabantaila da elurrik edo izotzik ez dagoen gainazaletatik igarotzean berehala degradatzen direla (esate baterako, tuneletan). Horregatik, komeni da tunelaren sarreran kentzea eta irteeran berriro jartzea, luzea bada behintzat.

• Kate konposatuak: Ehunezkoen antzekoak dira; baina, kasu honetan, zorroa kable plastikoen sare batek osatzen du, ehunezko materialez estalitako altzairuzko tako batzuekin.

• Kate erdiautomatikoak: “Spike Spider” ere esaten zaie. Bi zati dituzten gailuak dira: zati finkoa hagunean instalatuta dago, eta beste zatia zati finkoaren gainean oso erraz muntatzen eta desmuntatzen da. Eraginkorrak eta erabilerrazak dira, baina garestiak.

• Kate likidoak: Izena gorabehera, pneumatikoaren alboko aldeari aplikatzen zaion espraia da, une jakin batean itsaspena areagotzeko. Ez dira berezko katetzat jotzen; beraz, egoera dela-eta kateak erabiltzea nahitaezkoa bada, ez dago baimenduta halakoak kate konbentzionalen ordez erabiltzea.

Motozikletentzako kateak ere badaude, baina gomendatzen da horrelako ibilgailuak ez erabiltzea muturreko egoeretan eta zoru irristakorretan.

Biltegiratzea

Elurretako kateak ondo gordetzea eta kontserbatzea garrantzitsua da kateen iraunkortasuna eta eraginkortasuna luzatzeko. Hona hemen urrats batzuk behar bezala biltegiratzeko:

• Garbiketa: Gorde aurretik, garbitu ondo elurretako kateak. Kendu kateetatik edozein lokatz-, zikintasun- edo gatz-hondakin, korrosioa saihesteko.
• Lehorketa: Ziurtatu kateak erabat lehor daudela gorde aurretik. Hezetasunak korrosioa eragin dezake, eta materiala hondatu.
• Bilgarria edo edukiontzia: Gidari batzuek elurretako kateetarako poltsa espezifikoetan gordetzen dituzte, batera mantentzen eta haien artean ez korapilatzen laguntzen dutenak. Poltsa berezirik ez baduzu, kaxa edo ontzi garbi bat ere erabil dezakezu.
• Biltegiratzea: Gorde kateak leku lehor eta fresko batean (ahal dela, muturreko tenperatura-aldaketen eraginpean ez dauden eremu batean). Ez itzazu gorde zuzenean lurraren gainean, korrosioa prebenitzeko.
• Aldizkako berrikuspena: Gomendagarria da noizean behin kateak berrikustea biltegiratuta dauden bitartean, gerta daitekeelako kalteak, korrosioa eta gastatutako zatiak egotea eta gerora behar dituzunean ezin erabili ahal izatea.

Errepidean, ezustekorik ez: babestu zaitez zure auto-aseguruarekin eta elurretako kateekin: zure bidaiderik onenak izango dira neguan.

The post Elurretako kateak: zure bidaiderik onenak neguan appeared first on Blog de actualidad.

Patinete elektrikoen booma ukaezina da gaur egun; baina zerbait berria denez, legeria etengabe eguneratu eta berrikusi behar da. Lehenik eta behin, jakin behar duzu patinete elektrikoa bidegorrietatik erabili behar duzula oro har, eta inola ere ez espaloietan. Bestalde, oraindik ez da nahitaezkoa patinetea matrikulatzea ez eta kaskoa erabiltzea ere.

Beti komeni da asegurua edukitzea istripu bat gertatzen denerako, baina istripuak saihesteko modurik onena abiadura moderatuan ibiltzea da, beste patinatzaile edo txirrindulariei kalterik ez eragiteko. Kontuan izan legearen arabera bi urte inguruko epean zirkulazio-ziurtagiri bat beharko dela patinetea erabili ahal izateko. Agindu orokor horiez gain, autonomia-erkidego bakoitzak eskumenak ditu bere araudia argitaratzeko, betiere estatukoarekin bateragarria eta harmonizatua.

Horri dagokionez, Zirkulazioko Erregelamendu Orokorrak honako debeku eta muga hauek ezartzen ditu, besteak beste:

• Herri barruko bideetan abiadura 20 km/h-ra mugatzea, galtzadarako eta espaloirako plataforma bakarra duten bideetan; 30 km/h-ra, zirkulazio-noranzko bakoitzeko errei bakarreko bideetan; eta 50 km/h-ra, zirkulatzeko bi errei edo gehiagoko herri barruko bideetan. Udalerriak debeku zorrotzagoak ezarri ahal izango ditu, baina salbuespenak ere bai zirkulazio-errei bakarra izanez gero, muga handituz. Muga hori argitaratu eta 6 hilabetera sartuko da indarrean.
• MPIak zeharbideetatik, herriarteko bideetatik, autobideetatik eta autobietatik ibiltzea, herri barruan ibili arren, eta baita hiriko tuneletatik ere.

Neurri horien bidez, DGTk ezbehar-tasa murriztu nahi du, batez ere hiri-eremuan, eta mugikortasun-formula berriak eskaintzen dituzten ibilgailuen tratamenduei buruzko zalantzak argitu nahi ditu.

Zer gertatzen da patinetearekin istripu bat baduzu eta hirugarren bati kalte egiten badiozu?

Puntu honetan, besteak beste,istripu-aseguruaren edo Etxeko aseguruaren zeregina sartzen da, funtsean. Gaur egun, autonomia-erkidegoko gobernuak nahitaez ezarri ditu zenbait udalerritan, Alacanteko edo Benidormeko zirkulazioan, esate baterako. Bizi zaren zonan nahitaezkoa ez bada ere, babes-neurri gisa edukitzea gomendatzen dizugu.

Aseguru batek eskaintzen duen babesa, bai kalte pertsonalengatik, bai beste batzuei –hirugarrenei– egindako kalteetan izan dezakezun erantzukizunagatik. Gainera, kontuan hartzen baduzu legeria etengabe eguneratzen dela, ematen dizun babesa are handiagoa da; izan ere, istripu bat estal diezazuke hirugarren batzuk kaltetu direnean edo balizko kalte-ordain baten aurrean.

Asegurua oraindik nahitaezkoa ez bada ere eta legeria oraindik eboluzionatzen ari bada ere, komeni da indarrean dagoen araudiaren berri izatea. Horrela, joan den 2020ko azaroaren 11n BOEn argitaratu zen Zirkulazioko Erregelamendu Orokorra eta Ibilgailuen Erregelamendu Orokorra aldatzen dituen azaroaren 10eko 970/2020 Errege Dekretua. Horren ondorioz, 2021eko urtarrilaren 2an hauek sartuko dira indarrean:

Ibilgailuen Erregelamendu Orokorrean sartutako aldaketa garrantzitsuenak hauek dira:

Ibilgailu motordunen definizioa aldatu da, pedal-eragite lagundua duten pedal-bizikletak eta MPIak (mugikortasun pertsonaleko ibilgailuak) kanpoan utziz. Horrek esan nahi du ez dutela Nahitaezko Automobil Aseguru batek aseguratuta egoteko betebeharrik.

Definizio berri horrekin 3 ibilgailu-mota desberdin izango ditugu, eta horien artean patinete elektrikoak daude:

1. Mugikortasun pertsonaleko ibilgailuak (MPI): Plaza bakarra eta gurpil bat edo gehiago dituzten ibilgailuak, 6 eta 25 km/h bitarteko gehieneko abiadura duten motor elektrikoek propultsatuak. MPIek ez dute administrazio-baimenik beharko zirkulatzeko, baina bai baldintza teknikoak betetzearen eta identifikazioaren ziurtagiri bat. Hala ere, pendiente dago Trafikoko zuzendari nagusiaren ebazpen bidezko onespena, eta 24 hilabeteko epea egongo da aplikatzeko.
2. Pedal-eragite lagundua duten pedal-bizikletak: Bi gurpil edo gehiagoko bizikleta elektrikoak, pedaldunak eta motor elektriko batek lagunduak, 25 km/h-ko gehieneko abiadurarekin.
3. Motor-zikloa: 25 eta 45 km/h arteko gehieneko abiadura duten bizikleta elektrikoak.

Halako ibilgailuak, beraz, betebehar hau izango dute: Nahitaezko Automobil Aseguru batek aseguratuta egotea, “ibilgailu motorduna” kontzeptuaren barruan sartuko baitira. Era berean, matrikula eduki beharko dute.

Horrenbestez, zure patinete elektrikorako aseguruak bilatzea da modu bakarra istripuren bat izanez gero edo egungo araudiak jasotzen dituen beste kasu batzuetan erantzukizunik ez izateko. LagunAron zuretzako egokiena daukagu.

The post Zergatik komeni den zure patinete elektrikorako aseguruak begiratzea appeared first on Blog de actualidad.

Isunak kudeatzeko eta gidabaimena kentzeko zerbitzua gure Lagun Aro Automobilen Aseguruan kontratatuta eduki arren, gidari guztientzat gomendagarriena da ez egotea zehapen ekonomikoa jasotzea edo gidabaimeneko puntuak galtzea eragin litzakeen inolako egoeratan. Horregatik, garrantzitsua da Trafikoko Zuzendaritza Nagusiak Zirkulazio Kodean egindako aldaketak berrikustea eta gogoraraztea, baita errepideko edozein arau-hausteri dagozkion zehapenak ere, 2021eko urtarrilaren 1ean indarrean sartuko direnak.

Hauek dira arau-hauste arruntenen aldaketak:

• 3 eta 6 puntu artean mugikorra eskuan gidatzeagatik.
• 3 eta 4 puntu artean segurtasun-uhala, haurrak lotzeko sistemak, kaskoa eta bestelako babes-elementuak ez erabiltzeagatik, bai eta halakoak gaizki erabiltzeagatik ere.
• 200 €-ko zehapena eta 3 puntu galtzea radarrak hautemateko mekanismoak eramateagatik. Konektatuta dauden ala ez alde batera utzita. Inhibitzaileek 6.000 euroko zehapena eta 6 puntuko galera ekarriko dute, orain arte bezala.

Abiadura-mugak

Abiadura-mugen aldaketa nagusiei dagokienez, azpimarratu behar da hiriarteko bideetan jada ezingo dugula 20 km/h-an gainditu onartutako gehieneko abiadura aurreratzeko. Gainera, gure arreta guztia jarri beharko dugu gure kaleetako ohiko ibilbideetan, gerta daitekeelako ibilbidea oso ondo ezagutzen dugulako arau-hauste bat egitea eta puntuak galtzea ere ekar dezakeen isunarekin zigortzea. Herri barruko bideetako abiadura-mugak gogortzeak, hirietako ezbehar-tasa murrizteko helburuaz gain, autoaren erabilera arautu eta hiriko mugikortasun-modu berrietara egokitu nahi du.

Herri barruko bideetako abiadura-muga orokorrak hauek izango dira, sailkapen desberdinen arabera:

• Plataforma, galtzada eta espaloi bakarreko bideetan, muga 20 km/h izango da.
• Noranzko bakoitzeko errei bakarreko bideetan, muga 30 km/h izango da.
• Noranzko bakoitzeko 2 errei edo gehiagoko bideetan, mugak 50 km/h izaten jarraituko du.

Hiri-mugikortasuna

Hiri-mugikortasunari dagokionez, DGTk aldatu egin du ibilgailu motordunen definizioa. Azpimarratu behar da araudi berrian tranbiak albo batera uzten dituztela, baina bizikletak ere bai, pedalei eragiteko laguntza dutenak, 25 km/h-ko gehieneko abiadurarekin, eta mugikortasun pertsonaleko ibilgailuak (MPI). Aldaketa horren ondorio zuzena da horrelako ibilgailuen erabiltzaileek ez dutela Automobilaren Nahitaezko Aseguru bat (ANA) kontratatu beharrik. Aseguru bat kontratatu beharko dute bizikleta elektrikoekin edo 25 eta 45 km/h arteko gehieneko abiadura duen beste edozein motor-ziklorekin zirkulatzen dutenek. “Ibilgailu motordun” kontzeptuaren barruan sartuko dira, eta matrikula eduki beharko dute.

The post DGTk 2021ean aplikatuko dituen isunen eta puntu-galeren aldaketak appeared first on Blog de actualidad.

Txikien segurtasuna da garrantzizkoena. Gaur egun herritar gehienak jabetuta badaude ere haurrek beren adinaren arabera egokia den aulki mota erabili behar dutela ibilgailuaren barruan doazenean, ondo etortzen da beti haurrentzako aulki hauen araudian aplikatutako azken aldaketak errepasatzea.

Ez dago aitzakiarik. Nahitaezkoa da haurrei eusteko sistemak eramatea ibilgailuetan, eta horretan ez dago salbuespenik. Kontua ez da zehapen administratiboak saihestea –horrek ere eragina izango du zure poltsikoan–; haurrak eta haurtxoak ahalik eta seguruen edukitzea da garrantzizkoena. Logikoa, ezta?

2013an haurrei eusteko sistemei buruzko Europako araudi berri bat ezarri zen, ECE R129 izenez ezagutzen dena, eta i-Size gisa ere bai. Gradualki ezarriko zela erabaki zen, familiek eta fabrikatzaileak behar duten denbora izan zezaten aldaketa horiek ezartzeko.

Eta halaxe ari da egiten.

Egokitzapen horren azken fasean gaude; hirugarrenean, hain zuzen. Horregatik, gaur egun i-Size araudi berri hori indarrean dago 1982ko ECE R44/4 zaharrarekin batera. Baina laster amaituko da hori.

Aurreikusita dago 2021ean araudi zaharrak indarrean egoteari utzi diola; datorren urtean, alegia. Eta, beraz, haur txiki baten gurasoa bazara, gomendatzen dizugu aldaketa hauek aurten ezartzea.

Zer aldatzen da i-Size autorako aulkien araudi berrian?

Gaur egun haurrei eusteko sistemei buruzko bi araudi daudenez indarrean, garrantzitsua da bien arteko desberdintasunak zein diren jakitea. Horrela, jakinaren gainean egongo zara zure prebentzio-sistemak araudia betetzen duen edo ez, baina ez soilik orain, baizik eta datorren urtean ere bai.

Ezagutu behar dituzun alde nagusiak:

• Zaharkituta geratzen da pisuan oinarritutako sailkapena. Orain arte, HES sistemen sailkapena pisuan eta taldeetan oinarritzen zen: 0 taldea (10 kg arteko jaioberriak, 0 eta 0+ taldeak (13 kg arte), 1 taldea (9 eta 18 kg bitartekoak), 2 taldea (15 eta 25 kg bitartekoak) eta 3 taldea (22 eta 36 kg bitartekoak). Errepikatu egingo dugu: sailkapen hau zaharkituta geratuko da araudi berriarekin.
• i-Size sailkapen berriak altuera ere kontuan hartzen du. Araudi berri honek altuera eta pisuaren tartetan katalogatzen ditu haurrak. Konplexuagoa dela iruditzen bazaizu, oker zaude. Aulkien fabrikatzaileak aulki bakoitzaren erabilerarako gomendatutako altuera eta pisua adieraziko ditu, eta bezeroek haurraren fisionomiari ondoen egokitzen zaiona aukeratu beharko dute.
• Kontramartxako aulkiak edo rear-facing motakoak erabili beharra 71 cm arteko edo 15 hilabete arteko adingabeentzat. Haurrei eusteko sistema horiek haurrak babesteko diseinatuta daude, istripua izanez gero martxaren kontrako noranzkoan joanez inpaktuaren energia banatzeko, buruari, lepoari eta sorbaldari kalterik egin gabe, energia gorputz osoan zehar banatuz, lesio oso larriak saihestuz.
• i-Size bereizgarria. Aulkiak berak eta aulki hori jartzeko autoko eserlekuak bereizgarri hori eraman beharko dute.
• Isofix sistema nahitaez erabili beharra. Aulkiei atxikitzeko sistemen ISO estandar bat da, autoetan manufakturatzeko ainguratze-puntu serie bat definitzen duena, aulkiak azkar eta segurtasunez muntatzea ahalbidetuz.

i-Size homologazioa daukaten aulkiek zein altuera eta pisutarako gomendatuta dauden adierazten dute. i-Size etiketak (eskuinekoa), 67-105 cm bitarteko eta 18,5 kg edo gutxiagoko haurrentzat gomendatuta dagoela adierazten du. E4 Herbehereetako homologazio kodigoa.

Haurrek izan ohi dituzten lesioak murriztea

Araudi-aldaketak sistema horien segurtasuna hobetzeko egiten dira, eta, beraz, haurrek istripua edo talka izanez gero jasan ditzaketen lesioak murrizteko. Hona hemen adin-tarte bakoitzean izaten diren lesio ohikoenak:

• 0 – 2 urte: adin-tarte horretako lesio ohikoenak lepokoak izaten dira, bizkarrezurraren hauskortasunagatik eta buruaren tamainagatik sortuak batik bat.
• 2 – 4 urte: adin-tarte horretan lesio gehienak burukoak izaten dira, ornoak ez direlako mugimendu bortitzei eusteko behar bezain sendoak.
• 4 – 10 urte: haurrak, handiagoa denez, sabeleko lesioak izateko joera izango du barne-hemorragiak edo sabeleko lesioak izateko arriskua handitzen delako, organoak ez baitaude behar bezala lotuta abdomeneko egiturari.

Euro NCAP erakundeak egindako autorako aulkien segurtasun-proba.

Probetan, honako hauek ebaluatzen ditu Euro NCAPek: haurrei eusteko sistemek aurrez aurreko inpaktuetan eta albokoetan ematen duten babesa; ibilgailua prestatuta ote dagoen hainbat diseinu eta tamainatako aulkiak instalatzeko; eta ibilgailuan haurrentzako garraio segurua eskaintzen ote duten.

Autorako aulki bat aukeratu aurretik kontuan izan beharreko 5 azalpen

Autorako aulki bat aukeratu behar duzunean ia seguru burura etorriko zaizkizun hainbat zalantza argituko ditugu bost argibide hauetan.

1. Aulki bat i-Size gisa homologatuta ez egoteak ez du esan nahi homologatuta ez dagoenik.
   2018. urtean, aulki berriak lehenagoko ECE R44/4 araudiarekin homologatzeari utzi zitzaion, baina lehendik zeuden modeloak fabrikatzen jarrai daiteke, eta, beraz, erabiltzen ere bai 10 urte gehiagoz. 2038 arte.
2. Ezin da beti jarri homologazio berriko (i-Size) aulki bat edozein ibilgailutan.
   Ibilgailuak homologatuta egon behar du era horretako prebentzio-sistemak erabiltzeko; autoaren erabiltzailearen eskuliburuan egiaztatu ahal izango duzu.
3. Une honetan aulki bat badaukazu autoan (homologatua, noski) ez daukazu aulki berririk erosi beharrik.
   Baina kontuan izan behar duzu i-Size aulkiak seguruagoak direla; bestalde, hurrengo puntua ere kontuan hartu behar duzu.
4. Jada inpakturen bat jasan baduzu zure seme-alabekin, oso gomendagarria da aulkia ordeztea, itxura batean ondo dagoela eman aurren.
   Beharbada kaltetu egingo ziren ainguratzeak, itxiturak edo egitura, eta ikusten ez ditugun deformazioak ere egon daitezke.
5. Orain arte esandako guztia baliagarria da bigarren eskuko aulkietarako ere.
   Jada erabilitako aulki bat aprobetxatu behar baduzu, zirkulazio-istripu batean ez dela egon eta ez dela iraungi egiaztatu behar duzu. Bai, autorako aulkiek eraginkortasuna galtzen dute denborarekin eta erabilerarekin. Fabrikatzaile batzuek zehaztu egiten dute zenbat urtez erabil daitekeen segurtasun-prestazio egokiak mantenduz, eta aulkiaren beraren fabrikazio-data ere adierazten dute.

Azalpen hauekin, gainera, koinatuarena egin ahal izango duzu edozein solasalditan, hanka sartzeko beldurrik gabe.

Haurrak atzeko eserlekuan

Zaragozako Ibilgailuei buruzko Ikerketa Institutuaren bideo honetan azaltzen digute nola eraman behar diren 135 cm edo gutxiagoko altuera duten haurrak, eta zein salbuespen-kasutan ezin diren jarri atzeko eserlekuetan.

The post Autorako aulkien araudiak: horrela daude indarrean i-Size eta araudi zaharra appeared first on Blog de actualidad.

Eusko Jaurlaritzaren Trafiko Zuzendaritzan 2017an jarri zuen martxan bide-segurtasunarekin konprometitutako enpresen Innovabide sarea. Gaur egun, hogeita hamar bat erakunde dira (gara), esparru eta tamaina desberdinetakoak.

Sare honetan sartzean, Seguros Lagun Arok konpromisoa hartzen du bide-segurtasuneko praktika onak partekatu eta martxan jartzeko eta enpresaren kudeaketan integratzeko.

Errepidean lanerako bidean edo ibilgailu bat gidatzen den lanetan gertatzen diren istripuen kopurua murriztea da helburua, baita laneko bide-segurtasuna hobetzeko neurriak hartzeak duen garrantziari buruz sentsibilizatzea ere.

“In itinere” (lantokira joatean edo bertatik itzultzean) eta “in mision” (beren lana egiteko ibilgailu bat gidatzean) gertatutako istripuetan hildakoen eta zauritu larrien kopurua % 40 murriztea da xedea.

#Innovabide | Seguros Lagun Aro-ri (@seguroslagunaro) ere ongi etorria ematen diogu gure enpresa sareko kide berri gisa https://t.co/MqfaxTMcBM

También damos la bienvenida a Seguros Lagun Aro como nuevo miembro de nuestra red de empresas#Trafikoa #SeguridadVialLaboral #PRL pic.twitter.com/DeSpXayrSf

— @Innovabide_TrafikoaEJGV (@innovabide) December 9, 2019

Seguros Lagun Aro Innovabiden sartu ahal izateko, aseguru-etxeko talde desberdinetako pertsonek hausnarketa- eta kontraste-prozesua egin dute Eusko Jaurlaritzako Trafiko Saileko eta Euskaliteko ordezkariekin (Euskalit euskal erakundeen kudeaketa aurreratua sustatzen duen fundazioa da, haien lehiakortasunari eta garapen jasangarriari laguntzeko).
Sare horretan egoteak beste enpresa batzuekin praktika onak partekatzeko eta elkarrekin ikasteko aukera emango digu helburu horiek lortze aldera.

The post Bat egiten dugu Innovabiderekin, laneko bide-segurtasunaren aldeko sarearekin appeared first on Blog de actualidad.

Aurten, orain arte bi ekaitz bortitz izan ditugu. Gogor jo dute, eta triskantza, uholdeak, eta, batez ere, hotza, hotz handia ekarri dute. Ondorioz, errepideetan elurra izan dugu, eta elurrak zuriz estali ditu hiri osoak. Zure Instagramerako oso irudi polita eta dibertigarria bada ere, ez da gauza bera gertatzen eguneroko bizitzan.

Baina, adi, gaiari ekin aurretik oso garrantzitsua da zure pneumatikoen egoera egiaztatzea. Bestela kateek ezer gutxi balioko dizute…

Ezagutu zure autorako 4 kate-mota

Lau kate-mota daude, kate likidoak ez baitira halakotzat jotzen. Egia da estutasunetik ateratzeko balio dezaketela, baina ibilbide motzetan bakarrik, errodadurarekin eta urarekin kate likidoa desager baitaiteke. Gainera elurte handia gertatuz gero, agintari eskudunek ez dizute ibiltzen jarraitzen utziko kate fisikoak erabili gabe.

Hori esanda, egin dezagun dauden kate-moten errepaso bat, zure ibilgailuari eta eguneroko bizitzan hobekien egokitzen direnak zein diren jakiteko.

Metalezko kateak

Metalezko kateak ezagunenak, betiko kateak dira, elurrean eta izotzean oso ondo funtzionatzen baitute. Altzairuzko metalezko katebegiz osatuta daude.

Gainera, metalezko uztai edo altzairuzko kable bat izan ohi dute, gurpilaren barrualdean, eta tenkagailu bat edo batzuk kanpoaldean. Prezio onena dute, baina agian jartzeko zailenak dira. Horrez gain, esan beharra dago triki-traka eragiten dutela, eta askatzen badira autoari kalteak sor diezazkioketela.

Kontuan izan: Garrantzitsua da azpimarratzea kate horiekin metro batzuk ibili ondoren berriro tenkatu beharko dituzula.

Ehunezko kateak

Ehunezko kateak ehunkiz eginda daude; hortaz, oso gutxi pisatzen dute eta askoz errazagoa da haiek jartzea. Azken urteotan oso ezagunak egin dira, aurrekoak baino garestiagoak izan arren.

Esan dugun bezala, izan duten arrakastaren gakoa erraz muntatzeko modukoak izatea da eta ezin dutela ibilgailua kaltetu. Gainera, ez dute bibraziorik sortzen eta ez dute eraginik ibilgailuaren egonkortasunean. Hala ere, gutxien irauten dutenak dira, olana azkarrago higatzen baita elurrik gabeko zoladura gainean pixka bat ibiliz gero.

Kontuan izan: Erabilera labur eta noizbehinkakoetarako gomendatzen da.

Sare-kateak 

Pneumatikoetarako sare-kateak kate konposatu famatuak dira. Plastikozko kableen sare batez osatuta daude, eta kable horiek ehunkitan zorroratuta eta metalezko zirgiloz lotuta daude.

Ia ez dute bibraziorik sortzen; hortaz, oso gutxi nabaritzen dira gidagailuan eta esekiduran. Ehunezkoen antzera muntatzen dira baina tentsio handiagorekin.

Kontuan izan: Elurraren eta izotzaren gainean oso ondo funtzionatzen dute eta dezente gehiago irauten dute.

Kate erdiautomatikoak

Kate erdiautomatikoak, armiarma erakoak edo Spikes Spider izen panpoxaz ere ezagutzen direnak, maiz eta baldintza txarretan erabiltzeko pentsatutako kateak dira. Metalaz, plastikoaz, gomaz eta iltzez osatuak, segundo gutxitan muntatzen dira eta aproposak dira elur asko dagoen egoeratan.

Kontuan izan: Bizitza baliagarri oso luzea dute eta besteen prezioa gainditzen dute, alde handiarekin.

Kateei buruz jakin behar dituzun 6 gauza

1. Zure ibilgailuak neguko pneumatikoak baditu, ez duzu zertan kezkatu, elurretan ibiltzeko prestatuta baitaude.
2. Kateak jarri aurretik, ziurtatu leku seguruan zaudela, ahal bada galtzadatik aldendua.
3. Erabili eskularruak kateak jartzean ebakirik ez egiteko.
4. Kateak gurpil eragileen gainean jarri behar dira.
   • Zure ibilgailua aurreko trakziokoa bada, aurreko gurpiletan jarri beharko dituzu.
   • Zure ibilgailua atzeko propultsiokoa bada, atzeko gurpiletan jarri beharko dituzu.
   • Zure ibilgailuak lau gurpileko trakzioa badauka, egokiena lau gurpilen gainean jartzea izango da, baina kate-sorta bakarra baduzu, aurreko pneumatikoen gainean jarri beharko dituzu, norabidea aldatzeaz arduratzen direlako eta trakzio gehien galtzen dutenak direlako.
5. Autoz ibiltzean gorde segurtasun-distantzia. Orduko 40 kilometroko abiadura ez gainditzea gomendatzen da. Saihestu bat-bateko azeleratze eta balaztatzeak.
6. Kendu kateak beharrezkoak ez izan bezain laster, eta egiaztatu urraturik ez dutela.

Kateak jartzeak estres dezente sortzen digunez, batik bat eguraldi txarra dugunean, aldez aurretik eta baldintza hobeetan jartzeko saioak egitea gomendatzen dizugu.

Ibilgailuei buruzko Zaragozako Ikerketa Institutuaren bideo honetan, elurretan behar bezala gidatzeko hartu behar ditugun segurtasun-neurriak modu argi eta laburrean ezagutuko dituzu.

The post Ze kate behar ditu nire autoak? appeared first on Blog de actualidad.

Oinutsik, kamisetarik gabe edo bikinian gidatzea ez da segurua

Oinutsik gidatzea gustatzen zaizu, kamisetarik gabe, bikinian… gaizki! Zirkulazioko Erregelamendu Orokorrak –erabilgarri dago DGTren webgunean– ez du espresuki debekatzen, baina esaten du gidariak ibilgailua kontrolatzeko moduan egon behar duela une oro, eta badirudi horrela jantzita ez dela segurtasuna bermatzen.

Kamiseta, blusa edo alkandora jantzi gabe ere ez duzu gidatu behar. Ez da itxura onarekin gidatzeko arau bat; arau horren helburua da, hain zuzen, istripu bat izanez gero uhalarekin edo airbagarekin egin ditzakezun zauriak eta urratuak saihestea.

Uhala jartzeko keinua ia erreflexuzko ekintza bat da gehienontzat bolantearen aurrean esertzen garenean. Hala ere, batzuek ez dute jartzen bidaia laburretan eta beroa egiten duenean. Halako norbait ezagutzen baduzu, gogoraraz iezaiozu datu hau: 45 km/h-ko abiaduran zirkulatuz uhalik gabe istripu bat edukitzea hirugarren pisu batetik erortzearen baliokidea da. Ziur pentsaraziko diola.

Beti, beti, haurrak beren eusteko sistemarekin

Altxa dezala eskua hondartzarako bidean helduz betetako auto bat helduen belaunen gainean haurrak direla ikusi ez duenak… Halako irudiak orain ere ikus ditzakegu, udan batez ere. Presaka ibiltzea, ibilgailua aldatzea; “eramango ditut nik txikiak, aulkiak eta janaria; osabak eraman dezala eguzkitakoa, amona eta lehengusu handiak…”

Horrela ez. Beti saihestu behar diren bi zuhurtziagabekeria dira: onartutako bidaideak baino gehiago eramatea eta txikiak beren aulkirik gabe. Deserosoa izateaz gainera, ibilgailuan doazenak arriskuan jartzen dituen ohitura txar bat da.

Adingabeen kasuan, are gehiago gainera. 150 cm baino gutxiago neurtzen duten haur guztiek beren aulkian joan behar dute, homologatutako euste-sistemarekin eta beren altueraren eta pisuaren arabera. Aukeratzeko garaian ondo etorriko zaizu aurrez ezagutzea autorako aulkien sailkapena, adinaren araberakoa.

Gidatzea gustatzen zaizu…. besoa leihotik aterata?

Iragarkietako irudi tipikoa da: eguraldi ona, auto berria eta besoa aterata, airea azalaren gainean sentitzeko. Eguzki eta hondartzako eguna izorra diezazukeen 80 euroko isun posible batez gainera, pentsa ezazu literalki besoa gal dezakezula autoa irauliz gero edo beste ibilgailu baten aurka talka eginez gero. Beti saihestu beharreko arriskua da. Gogoan izan, gainera, leihoa bera ibilgailuaren babes-elementu bat gehiago dela.

Kaskoa buruan ibili munduan

Bizitza ken diezazukeen zuhurtziagabekeria bat izateaz gainera, arau-hauste larria da eta 200 euro arteko isuna ekar diezazuke, eta 3 puntu gutxiagorekin utzi gidabaimena. Legeak ez du horretara behartzen motozikleta edo ziklomotorra gidatzen duena bakarrik, bazik eta bidaideak ere bai. Hau da, “pakete” gisa doanak ere kasko babeslea eraman beharra dauka.

1992an kaskoa eramateko betebeharra ezarri zenetik, kaskoa ez bada eramaten trafiko-agenteek motoa ibilgetzen dute, eta, gainera, motoa kendu eta gordailutu dezakete. Nahitaezkoa da euroguneko herrialde ia denetan, baina batez ere, beste ezeren gainetik, zure buruarentzako segururik onena da, traumatismo kranioentzefalikoaren arriskua murrizten duelako istripurik izanez gero.

Bizikletaz zirkulatzeak ere kaskoa eramateko betebeharra du: nahitaezkoa da 16 urtetik beherakoentzat eta txirrindulari guztientzat hiriarteko bideetan zirkulatzean.

Praktika txarrak gidatzean

Oporretara zoazela (edo itzultzen ari zarela) bidean bokata janez aurrera egitea erabaki duzu… Gogoan izan bolantearen aurrean jateak edo edateak mugatu egiten duela erreakzionatzeko gaitasuna eta mugimenduak ere mugatu egiten dituela. Horregatik, egin zure segurtasunaren alde eta gera zaitez hurbilen duzun gasolina-zerbitzugunean indarberritzeko, eta ondoren jarraitu bidaiarekin.

Bistakoa denez, ezin da GPSa manipulatuz joan, ezta whatsapp mezuak bidaliz ere. Bi praktika horiek efikazia kentzen diete gainerako zentzumenei, eta arriskuan jartzen dute gidatzeko prozesua. Gainera, arau-hauste larriak dira: 200 euroko isunak ekar ditzakete, eta 3 puntu kendu gidabaimenari. Hortaz, bidaiari ekin aurretik programatu beti GPSa edo utzi zeregin hori kopilotu on baten esku.

Batzuetan, praktika txar horiek benetan eragiten duten arriskuaren arrisku-pertzepzio txikiagoa izaten dugu errepidean gaudenean.

Beraz, uda izan arren eta oporretan egon arren, bolantearen aurrean jartzen bazara, zuhur jokatu eta pentsatu batez ere zure segurtasunean, inguruan dituzunen segurtasunean, eta, zergatik ez, zurekin errepidea partekatzen dugunon segurtasunean.

The post Oporrak erlaxatzeko dira, baina ez gidatzen ari garen bitartean appeared first on Blog de actualidad.