Egoera batzuetan beharrak eraginda jartzen gara gurea ez den ibilgailuaren bolantean (larrialdiren bat…), edo bidaide guztien segurtasunean pentsatuz (lagunak edan du…). Edo, besterik gabe, familiarteko batek edo bikotekideak utzitako autoa gidatzen dugu. Baina zer gertatzen da gorabeheraren bat gertatzen bazaigu eta polizan ez bagara azaltzen noizbehinkako gidari nahiz ohiko gidari gisa?

Ondorio fisiokoez gain, baliteke beste ondorio ekonomiko batzuk ere jasan behar izatea; horrek beti gogoratuko digu gurea ez zen autoaren bolantean jartzea erabaki genuen eguna.

Hasiera batean, noski, polizan azaltzen diren pertsonak estaltzen dira inolako arazorik gabe.

Nolanahi ere, zure izena aseguruaren paperetan azaltzen ez bada ere, aseguru-etxea gastuez arduratuko da adin-eskakizun eta baimen-urte jakin batzuk betetzen badituzu. Aseguru-etxearen baldintzen mende ere egongo da.

Beste gidari bat estaltzea

Poliza batzuk nominatiboak dira; hau da, kontratuan azaltzen den/diren pertsonak/pertsonek bakarrik gida dezake(te) ibilgailua.

Kasu horretan, ibilgailua beste batek gidatuko balu, aseguru-etxeak ezingo lioke uko egin Nahitaezko Erantzukizun Zibila estaltzeari hirugarren kaltedun baten aurrean. Kontuz: aseguru-etxeak kalte-ordainean emandako zenbatekoak erreklama liezazkioke aseguru-hartzaileari eta/edo gidariari. Gainerako estalduren kasuan, baliteke kalte-ordainik ez ematea.

Kasu batzuetan, polizak nominatibo dirudien arren, ez da.

Alegia: nahiz eta auto-aseguruan hainbat pertsona ohiko eta noizbehinkako gidari gisa deklaratuta azaldu, hirugarren pertsona batek ere gida lezake. Hori horrela da baldin eta deklaratutako pertsonek baino arrisku handiagoa eragiten ez badu. Horrek esan nahi du hirugarren pertsona hori ezin dela deklaratutakoak baino gazteagoa izan edo ezin duela deklaratutakoak baino baimen-antzinatasun txikiagoa eduki.

Hala izango balitz, hirugarrenekiko gorabehera batean eta Nahitaezko Erantzukizun Zibilaren estaldurari dagokionez, aseguruak ezin dio uko egin kalte-ordainari, baina baliteke gainerako estalduretan erregela proportzionalak aplikatzea.

Seguros Lagun Aroren kasuan

Seguros Lagun Arorekin nahitaez deklaratu behar dira:

• aseguratutako ibilgailuak gidatuko dituzten 27 urte baino gutxiagoko eta 4 baimen-urte baino gutxiagoko pertsonen izenak,
• eta betiere espresuki deklaratuta egongo da ibilgailua gidatuko duen gidari gazteena eta baimen-antzinatasun txikienekoa.

Nolanahi ere, gure polizek aukera ematen dute zure ibilgailua 27 urte baino gehiagoko eta 4 urteko baimen-antzinatasuna baino handiagoko edozein gidarik gidatu ahal izateko noizbehinka eta deklaratu beharrik gabe, behar izanez gero zure polizak malgutasun egokia izan dezan.

Gomendioak

Horregatik guztiagatik, zure familiarteko, lagun nahiz lankideren batek zure ibilgailua erabiltzen badu, onena izango litzateke zure polizan azaltzea. Gidari nagusi, noizbehinkako nahiz bigarren gidari gisa sar daitezke. Horrela, lasai gidatuko dugu, edozein gorabeheraren aurrean estalita gaudela baitakigu.

Lagun Aroren “Gidari superbabestua” bezalako estaldurak ez dira oso ohikoak merkatuan

Badago beste aukera bat, baina jende askok ez du ezagutzen: estaldura bat kontratatzea polizan ohiko gidari gisa deklaratutakoa beste norbaiten ibilgailua gidatzen duenean ere estaltzen duena.

Ez da batere ohikoa merkatuan, baina Lagun Arok badauka. “Gidari superbabestua”ren estaldura da, eta ibilgailu bat baino gehiago erabiltzen dituzten bezeroei segurtasuna emateko sortu da. Aukerako estaldura honek zure polizako Gidariaren Istripuen kapitalak bermatzen ditu ezintasun iraunkorraren edo heriotzaren kasuetan familia-unitatetik kanpoko ibilgailu bat gidatzen baduzu; eta bereziki erabilgarria da zure autoa gidatuko zenukeen kasuan izango zenituzkeen kapital berak bermatzen dizkizulako.

Ibilgailu bat alokatuz gero, lasai! Ohikoena da alokairu-konpainiak erantzukizun zibilaren gutxieneko asegurua sartzea bere autoetan, eta, kasu batzuetan, estaldura gehigarri batzuk ere bai.

The post Aseguruak estaltzen al nau beste baten autoa gidatzen badut? appeared first on Blog de actualidad.

Espainian, 2018ko abuztuan, 31.205.331 ibilgailu aseguratu kontabilizatu ziren, hau da, legea betetzen dute. Aitzitik, DGTk kalkulatzen du beste 2 milioi gidari arriskuan daudela diru-zehapen gogorrak izateko, ibilgailua ibilgetzeko edo gidabaimena kentzeko, legea ez betetzeagatik.

Mito eta kondairek ez dute balio: ibilgailu guztiek legez aseguratuta egon behar dute. Eta norbaitek pentsatuko du gutxi erabiltzen duenez eta egun osoa aparkatuta daukanez ez duela merezi ordaintzea. Bada, hanka-sartze larri-larria da, eta ez soilik administratiboa, zeinak kalte handia egin diezaiokeen zure poltsikoari, baizik eta elkartasunik ezekoa ere bai.

Ez da aseguru-etxeen apeta

Automobilaren nahitaezko asegurua ez da existitzen aseguru-etxeen gurari edo apetagatik. Beste arrazoi bat dago. Gurea bezalako gizarte garatu eta motorizatuan, non ogia erosteko ere autoa hartzen dugun, funtzionatzen duen eta auto-istripuen biktimek kalte-ordaina jasoko dutela bermatzen duen sistema bat behar da.

Ulertzen erraza da. Gizartea izaki, badakigu automobil ibilgailuak arriskua dakarrela berez, eta, hortaz, halako bat erosten dugunean erantzukizun objektibo bat daukagula. Hau da, motordun ibilgailua edukitzeagatik bakarrik, harekin eragin ditzakegun kalteen erantzuleak gara, errudunak izan nahiz ez. Eta erantzukizun hori aseguruarekin estaltzen dugu.

Gidari guztiok sartzen garen elkartasun-sistemaz ari gara. Baina norbaitek elkartasun-eskema horretan parte hartzeari utzi eta aseguratu gabeko ibilgailua erabiltzea erabakitzen duenean, lortzen duen gauza bakarra da beste batzuek ordaintzea berak eragindako kalteen ondorioak.

Poliziak jakiten badu asegururik gabe gidatzen ari zarela, prestatu diru-zorroa

Baliteke zuri bost axola izatea gainerako gidariak, baina sinets iezaguzu esaten dizugunean kaltetuena zeu izango zarela.

Hasteko, asegururik gabe ibiltzea arau-hauste administratiboa da. Poliziak geldiaraztea eta zure autoak erantzukizun zibileko asegururik ez daukala jakitea nahikoa da 650 € eta 3.000 € bitarteko isuna jartzeko.

Autoa aparkatuta badaukat, kasu horretan ere nahitaezkoa da asegurua?

Bai, nahiz eta zure autoa aparkatuta egon, aseguratuta eduki behar duzu. Izan ere, gure autoak denboraren % 97a aparkatuta pasatzen du hainbat txostenen arabera. Udal batzuek IAT pasatu gabeko edo asegururik gabeko ibilgailuak kentzeko kanpainak ere egiten dituzte.

Aparkatuta dauden autoen jabeek egunean izan behar dute haien aseguruaren ordainketa; bestela, zehapen berberak izateko arriskua dute. Horren zergatia hauxe da: leku finko batean aparkatuta dagoen ibilgailua hirugarrenei kalte egiten dioten ezbeharrak izateko arriskuan egon daiteke, hala nola sute baten eragile izan edo hura zabaltzearena.

Erabiltzen ez diren autoak ere aseguratu behar dira

Europar Batasuneko Justizia Auzitegiaren (EBJA) duela gutxiko epai batek erabiltzen ez diren autoak aseguratzera behartzen du. Epaitzaren jatorria Portugalen izandako gertaera batean dago. Erabaki horren baitan sartzen dira, era berean, zirkulazio-baimena izan baina jabeak gidatzeko asmorik ez izan eta lursail pribatuan aparkatuta dauden ibilgailuak.

Auzia Auzitegi Goren portugaldarrak ebatzi beharko badu ere, Europar Batasuneko auzitegi nazional guztiak lotuta geratuko dira erabaki horri.

Berreskaera-eskubidea asegururik gabeko ibilgailuen istripuetan

Aseguratu gabeko ibilgailu batekin istripu bat eragin duzunean hasten da benetako arazoa. Txarrenean jarrita, aseguratu gabeko ibilgailu baten jabea automobil horrekin izandako ezbehar baten erantzule izanez gero erantzukizun garrantzitsuei egin beharko die aurre.

Pertsona horrek bere gain hartu beharko lituzke sortutako kalteak konpontzeko gastuak, zaurituei laguntzeko gastuak halakorik izanez gero, besteak beste, une horretara arte aurreikusitako zehapenak barne.

Biktimei beti ematen zaie kalte-ordaina

Indarrean dagoen legediak bermatzen du biktimek ez dezatela beren gain hartu asegururik gabeko beste gidari batzuek eragindako kalteak. Kasu horretan, Aseguruen Konpentsazio Partzuergoa —noizbait aipatu izan dizugu— arduratzen da biktimei ordaintzeaz.

Eta ondoren, Partzuergoak ordaindu duena erreklama diezaioke aseguratu gabeko ibilgailuaren jabeari. Bestela esanda: Partzuergoak diru-kopuru bat ordaintzen du baina gero hura ordaindu behar lukeenari erreklamatzen dio. Berreskaera-eskubidea esaten zaio. Seguru gauden azalduko dizute noiz eta zein kasutan egikari daitekeen eskubide hori.

Bada, ez dago asko gehiago esaterik. Istripu bat izaten baduzu eta nahitaezko asegurua ez baduzu, tontakeria horrengatik goian zerua eta behean lurra duzula gera zaitezke.

The post Autoa aseguratzea nahitaezkoa da, baita erabili gabe ere appeared first on Blog de actualidad.

Erreskate-orria edo -txartela autoan eramatea ondo etortzen da erreskate-zerbitzuentzat, horrela bizkorrago egin ahal izaten dutelako ibilgailuaren ebakuazioa, eta, horrez gain, funtsezko abantaila da ibilgailuan doazenentzat ere. Ikus dezagun zergatik.

Zergatik da garrantzitsua?

Istripu bat gertatzen denean, berebiziko garrantzia du erreakzio-denborak, horren arabera larriki zauritutako pertsona bat bizirik atera baitaiteke edo ez. Norbanakoen biziraupena bermatzeko, istripua izandako unetik ospitalera eraman arteko tarteak ez du izan behar ordubete baino handiagoa. Hortaz, denok ados gaude funtsezkoa dela istripua izandako pertsona askatzeko zereginetan laguntzea, eta lan hori egiteko modurik onena dokumentua edukitzea da.

Erreskate-orriari esker erreskate-zerbitzuek behar bezala jardun dezakete eta ahalik eta azkarren gainera, ibilgailuan doazenak ahal bezain laster eta seguru askatzeko. Besteak beste, ibilgailuaren ebaketa-puntuak zein diren jakiteko aukera emango die, gasolina-tanga edo tentsio handiko puntuak non dauden bezalako faktore garrantzitsuak aintzat hartuz. Gure autoan jartzeko ahalegina egiten badugu, larrialdietako zerbitzuek bizkorrago jokatu ahal izango dute.

Non jarri behar dut erreskate-orria?

Erreskate-orria inprimatzea eta gidariaren eserlekuko eguzki-babesean jartzea gomendatzen da, erraz iristeko modukoa baita eta denbora gutxiago beharko dute lortzeko. Gainera, gomendatzen da haizetakoaren behe-ezkerraldean eranskailu identifikagarri bat jarrita edukitzea, dokumentazio hori badaukagula jakin dezaten erreskate-zerbitzuek. Xehetasun txiki bat baino ez da, ahaleginik eskatzen ez duena eta bizitza asko salba ditzakeena, gure bizitzatik hasita.

Horregatik guztiagatik, erreskate-orriak bizitzak salbatzen ditu inolako zalantzarik gabe eta, gainera, oso ahalegin txikiarekin lor dezakegun zerbait da. Gure ibilgailuari dagokiona bilatu eta behar bezala jarri baino ez dugu egin behar. Keinu txiki horrek, istripurik izanez gero, izugarri lagunduko digu.

SEAT Leon eta Peugeot 3008 HYbrid4 modeloen erreskate-orrien adibideak

Erreskate-orrien zerrenda

Zerrenda honetan erreskate-orriak eskaintzen dituzten fabrikatzaileak azaltzen dira. Kontuan hartu modelo batzuek bakarrik eskaintzen dituztela erreskate-orriak, eta batzuetan ez daudela gaztelaniaz.

Hona Espainian gehien saldutako marken erreskate-orriak deskargatzeko esteka:

• SEATen gaztelaniazko eta alemanezko erreskate-orriak
• RENAULTen alemanezko erreskate-orriak
• VOLKSWAGENen alemanezko erreskate-orriak
• OPELen gaztelaniazko erreskate-orriak
• PEUGEOTen gaztelaniazko erreskate-orriak
• FIATen gaztelaniazko (PDF) eta alemanezko erreskate-orriak
• CITROËNen gaztelaniazko erreskate-orriak
• KIAren gaztelaniazko erreskate-orriak
• TOYOTAren alemanezko erreskate-orriak
• HYUNDAIren gaztelaniazko erreskate-orriak (PDF)

Gaztelaniazko erreskate-orriak dituzten beste auto-marka batzuk:

• MAZDAren gaztelaniazko erreskate-orriak
• SKODAren gaztelaniazko erreskate-orriak
• HONDAren gaztelaniazko erreskate-orriak
• SUZUKIren gaztelaniazko erreskate-orriak
• MERCEDES-BENZ, SMART eta MAYBACHen gaztelaniazko erreskate-orriak
• ALFA ROMEOren gaztelaniazko erreskate-orriak (PDF)
• FORDen gaztelaniazko erreskate-orriak (PDF)
• LANCIAren gaztelaniazko erreskate-orriak (PDF)

Kontsultatu beste marka eta hizkuntza batzuk Automobilaren Nazioarteko Federazioaren Rescue Sheet webgunean.

The post Zergatik da garrantzitsua erreskate-orria edukitzea? appeared first on Blog de actualidad.

Automobilen Aseguru-etxeen Espainiako Bulegoak (OFESAUTO) urte batzuk daramatza nolabaiteko nahasmena antzematen, bai sektorean eta bai aseguratuen artean, atzerriko errepideetan ibiltzeko dokumentu horren derrigortasunari buruz. Kasu gehienetan, zalantza horiek aseguru-etxeek beraien aseguratuei dokumentu hori ematen jarraitzeko ohiturak sortzen dituzte edo bezeroek eskatzen dutelako sortzen dira. Karta Berdea eramatea nahitaezkoa ez den arren, Seguros Lagun Arok eramaten jarraitzeko gomendioa egiten du, ez delako ezer kostatzen eta atzerriko errepideetan izan ditzakezun arazoen aurrean lagungarri gerta dakizukeelako.

Zer da Karta Berdea?

Aldez aurretik ezarritako formatua eta hizkuntzak dituen nazioartean onartutako dokumentu estandarra da. Dokumentuak adierazten du automobil-asegurua duzula eta, errepidean arazoren bat izanez gero, atzerrian (Europako Esparru Ekonomikoko eta Berme Hitzarmen Multianiztunari atxikitako herrialdeetan) zabiltzala zure ibilgailuak eragindako istripuen biktimei gutxieneko aseguru-estaldura eskaintzen diela

II. Mundu Gerran sortu zen, ibilgailuen trafikoa areagotu zenean mugen arteko ibilgailuen zirkulazioa kudeatzeko eta bizkortzeko sistema bat ezartzea beharrezkoa egin zenean. Kontu hori Nazio Batuen Erakundeak planteatu zuen. Gaiari aurre egiteko irtenbide bakarra gomendatzea erabaki zuen, hain zuzen ere, 30eko hamarkadan iparraldeko herrialdeetan ezarritakoa. Gomendioa “Genevako gomendioak” deiturikoetan txertatu zen. Han sortu zen “Karta Berdearen Sistema” deiturikoa.

Karta Berdea, ez da nahitaezkoa baina bai gomendagarria

Automobilen aseguruari buruzko Batasuneko lehen eta bigarren Zuzentarauen ordenamenduaren transposizioaz geroztik, erantzukizun zibilaren estaldura, ordura arte Karta Berdeak estaltzen zuena, guztiz bermatuta geratu zen Europako Esparru Ekonomikoaren lurralde osoan eta hari atxikitako estatuetan, esaterako, Andorran, Suitzan eta Serbian. Beraz, nahikoa izango litzateke Espainian egindako aseguru-kontratua aurkeztea.

Gerta daiteke Europako zenbait herrialdetan, esaterako, Portugalen, Karta Berdea aseguru-estaldura egiaztatzen duen dokumentua izatea. Kasu horretan ibilgailu nazionalentzat soilik izango litzateke baliagarria eta aplikagarria, ez Batasuneko ibilgailu guztientzat baina, hala ere, ez litzateke gehiegizkoa izango Karta Berdea izatea.

Hauxe da arrazoi nagusia: asko errazten dituela izapideak aldez aurretik ezarritako formatua eta hizkuntzak dituen egiaztagiri “unibertsala” delako, eta ez zure jatorriko hizkuntzan idatzitako ordainagiria edo baldintza partikularrak. Horri gehitu behar zaio gidariek aseguruaren ordainagiria gordetegian ez sartzeko ohitura, Estatuan dabiltzanean trafiko-agintariek FIVAn (Ibilgailu Aseguratuen Fitxategi Informatiboa) sartzeko aukera dutelako dokumentazioa eskatu aurretik. Dokumentazioa eramatea bada nahitaezkoa.

Karta Berdea ez eramateak eskatzen du bidaiari hasiera eman baino lehen helmugako herrialdearen egoerari oso adi egotea. Zenbait herrialdek aseguruaren estalduran sartzeko edo handik irteteko aukera dute egonkortasunaren arabera. Estaldura eskaintzen duten herrialdeen zerrendatik kanpo utziko lituzke horrek. Herrialdeen zerrenda OFESAUTO erakundearen web-orrian aurki dezakezu.

Zein herrialdetan behar dut Karta Berdea?

Gaur egun, Karta Berdearen premia Europako Esparru Ekonomikotik kanpoko 14 herrialdetara mugatzen da. Hauek dira: Albania, Azerbaijan, Bosnia-Herzegovina, Bielorrusia, Israel, Iran, Maroko, Moldavia, Mazedonia, Tunisia, Turkia, Ukrainia, Errusia eta Montenegro.

Eta zeure buruari galdetuko diozu, zer egingo dut Europako Esparru Ekonomikokoa ez den eta Karta Berdeak balio ez duen herrialde batean banago? Ez kezkatu. Kasu horretan, herrialdera iritsi bezain laster mugako aseguru bat kontratatu ahal izango duzu, istripuren bat izanez gero erantzukizun zibileko aseguru gisa balioko dizuna.

The post Nahitaezkoa al da atzerrira Karta Berdea eramatea? appeared first on Blog de actualidad.