Hemen, aseguruen sektorean, figura oso garrantzitsua sartzen da: peritua. Aseguru-peritua ezbehar baten ondorioak ikertzeaz eta aztertzeaz arduratzen den aditua da, kalte-ordainaren edo konponketaren kostua baloratu ahal izateko. Horretarako, polizen klausulen xehetasunak ezagutu behar ditu, eta balizko iruzurrak detektatzeko eta saihesteko gai izan behar du. 

Funtzio hau asko aldatu da azken urteotan. Antzina kalteak baloratzera mugatzen ziren, eta gaur egun aseguru-etxeari eta bezeroari ezbeharra behar bezala konpontzen laguntzera bideratuta daude. Izan daitezkeen iruzurren ikertzaile nagusiak dira, ezbehar batean adierazitako kalteak bezeroak adierazitakoarekin bat datozen edo bateragarriak diren detektatuko baitute.

Post honetan aseguru-perituen lanean zentratuko gara, zehazki auto- edo etxe-aseguruetan, baina badira beste peritu-mota asko, hala nola peritu medikoak, kaligrafoak, psikologoak, etab. 

Adibidez, zure etxeko ezbehar batean, zein da peritu baten lana?

Zure ezbehar-motaren edo kalteen arabera, zure aseguru-etxeak kalteen peritazioa beharrezkoa den ala ez jakinaraziko dizu, perituak ez baitu beti parte hartzen ezbehar batean. 

Gaur egun, gainera, ez da beharrezkoa peritazioak presentzialak izatea. Lagun Aron urruneko peritazioak egiten ditugu bezeroarentzako ahalik eta arinen eta erosoenak izan daitezen; horri bideo-peritazio esaten diogu. 

Perituak bisita bat amaitzen duenean presentzialki edo urrunetik, txosten bat egingo du, kalteak, balorazio ekonomikoa eta matxura edo gorabehera konpontzeko esku hartu behar duten gremioak zehaztuz, betiere zure polizaren estaldura-mailaren arabera.

Bezeroarentzat inpaktu handiena duten ezbeharretan, perituaren beste funtsezko lan bat da bezeroa ezbeharra izapidetzeko prozesuan orientatzea. Laburbilduz, funtzio hauek ditu:

• Ezbeharraren jatorri-arrazoia zehaztea
• Gertatu diren kalteak zehaztea 
• Kalteak baloratu eta horiek konpontzeko modurik onena zein den zehaztea
• Aseguru-etxeari inplikatutakoak zein diren jakinaraztea: eragilea eta kaltetuak. Adibidez, zuk beheko bizilagunari kalteak eragin dizkiozula zehaztea.

Eta automobilaren ezbeharretan? 

Auto-ezbeharretan, aldiz, peritu batek esku hartu ohi du.

Tailerrera egindako bisitan, perituak istripuaren kausak eta eragindako kalteak egiaztatu behar ditu, eta, horiek koherenteak badira bezeroak partea jakinaraztean adierazitakoarekin, begiratu behar du ea polizan estalita dauden, eta, kasu horretan, dagozkion konponketaren edo kalte-ordainaren kostua ebaluatu behar du.

Horrela, perituak txosten bat egingo du honako hauekin:

• Konponketa egiteko ordu-kopurua
• Eskulanaren orduko prezioa
• Zer egingo den konponketan. Kaltetutako piezak konpondu behar diren edo ordeztu behar diren, etab.
• Konponketa posible den edo konponketaren balioa ibilgailuarena baino handiagoa den; kasu horretan, konponezina da, eta “erabateko galera” ezarriko da.
• Konponketaren jarraipena ere egiten dute, adostutako guztia konpontzen dela eta aldatu beharrezkotzat zehaztutako piezak jatorri egokikoekin ordezten direla kontrolatzeko.

Laburbilduz, peritu baten funtzioa funtsezkoa da ezbeharren kudeaketan, ezbeharrean zer eta nola gertatu den zehazteko, kalteak baloratzeko eta dagokion konponketa edo kalte-ordaina zehazteko estimazio ekonomiko bat egiteko. 

The post Zer da aseguru-munduko peritazioa? appeared first on Blog de actualidad.

Batzuetan, bizitza-aseguruaz eta ehorzketa-aseguruaz hitz egin ohi da gauza bera izango balira bezala; baina, egiazki, desberdinak dira, eta une desberdinak estaltzen dituzte. Biek gertakari bera kontuan hartzen badute ere –aseguratuaren heriotza–, desberdin egiten dituzten bestelako zerbitzu eta estaldura batzuk dituzte

Bizitza-aseguruak konpentsazio ekonomiko bat eskaintzen die aseguratuak izendatutako onuradunei, aseguratuaren heriotza gertatuz gero edo aseguruan ezarritako kausak betez gero. Izan daiteke aseguratuaren heriotza, baliaezintasuna edo gaixotasuna. Bestalde, Ehorzketa-asegurua heriotzaren uneaz beraz arduratzen da. Heriotzaren ondoriozko kostu ekonomikoa, izapideak, lekualdatze-zerbitzuak, laguntza psikologikoa era abar estaltzen ditu. Esan dezakegu bizitza-asegurua heriotzaren ondorioak estaltzeaz arduratzen dela –esate baterako, familiaren galera ekonomikoak (zorrak, hipotekak, familiaren laguntza…)–, eta ehorzketa-aseguruak, berriz, heriotzaren izapideak estaltzen dituela (paperak, lekualdaketak, etab.). Baina kontzeptua ez da bi aseguruak bereizten dituen alderdi bakarra:

• Aseguratutako zenbateko ekonomikoa:  Ehorzketa-aseguruan, asegurua kontratatzen duen pertsonak aukeratutako zerbitzuen eta ezaugarrien arabera kalkulatzen dira urteko kuotak (adibidez, ehorzketa- edo errausketa-mota, bizilekua ez den beste herri batean ehorztea, DNA kontserbatzea, etab.). Bizitza-aseguruan, berriz, aseguru-hartzaileak kontratatu nahi duen kalte-ordainaren zenbatekoa zehazten du, eta, horren arabera, aseguru-etxeak zehaztutako epeetan abonatuko den urteko prima bat ezartzen da.
• Oinarrizko klausulak: Esan dugunez, bizitza-aseguruek konpentsazio ekonomiko bat ezartzen dute, aseguru-hartzailea hilez gero familia-egonkortasunari eusteko. Ehorzketa-aseguruan, aldiz, senitartekoaren ehorzketa-izapideen ondoriozko gastu eta eragozpenetatik askatzen du familia. Aipatu beharreko alderdi bat: ehorzketaren edo errausketaren gastuak aseguratuak ordaindutako zenbatekoa baino txikiagoak badira, aseguru-etxeak diferentzia abonatu beharko dio hildakoaren familiari.

Egia da, halaber, oso antzeko estaldurak daudela. Adibidez, bizitza-aseguruetan gehitzen diren estaldura batzuk berez ehorzketa-aseguruarenak dira, hala nola Heriotza-estaldura. Adibidez, Lagun Aroren Bizitza-aseguruan 3.000 euroko kapital-aurrerakin bat sartzen da, gastu berehalakoenei aurre egiteko. Gainera, ehorzketari nahiz heriotzari buruzko estaldurak ere sartzen dira, hala nola testamentu pertsonala edo familiarra eta bizi-testamentua, edo aholkularitza eta heriotzarekin eta oinordetza-prozesuarekin zerikusia duten izapide guztiak; horrela, heriotza-aseguru espezifikorik ez dagoen kasuak estaltzen dira.

Bestalde, ehorzketa-aseguruek nahiz bizitza-aseguruek gero eta estaldura eta zerbitzu gehigarri gehiago eskaintzen dituzte heriotza-unetik kanpo. Adibidez, Lagun Aroren Bizitza-aseguruetan, gaixotasun larrien estaldura espezifikoak sartzen ditugu, minbizia, infartua, paralisia eta antzeko gaixotasunen eta ezintasun iraunkor edo aldi baterakoen kasuan baliabide ekonomikoak emateko. Estaldura bereziak ere baditugu, hala nola Bigarren Diagnostiko Medikoa edo Errehabilitaziorako eta txertatzen, egokitzen eta mugikortasunean laguntzeko programa. Bestalde, bezeroari beste zenbait egoeratan laguntza eskaintzeko beste zerbitzu batzuk ere aurreikusten dira, hala nola seme-alabak edo mendeko familiartekoak zaintzea, etxeko laguntza, etab. Beraz, gai horietan pentsatzea inork gogoko ez dugun arren, garrantzitsua da ehorzketari buruzko gaiak ondo lotuta uztea, ehorzketa-aseguru espezifiko batekin eta/edo heriotzarekin zerikusia duten zerbitzuak eta estaldurak barne hartzen dituen bizitza-aseguru batekin –bizirik zaudela ere segurtasuna eta babesa emango dizu–. 

The post Ehorzketa-asegurua eta bizitza-asegurua berdinak al dira? appeared first on Blog de actualidad.

Zein dira Etxeko Aseguruaren berrikuntzak?

Gure Esku-trebea PLUS zerbitzua hobetu dugu, iturgintza-lanak gehituz, hala nola zisterna-mekanismoa aldatzea edo txorrotak ordeztea, doitzea eta instalatzea. Estaldura hau gure modalitate osoenean —etxea PLUS— sartzen da, eta orain, gainera, zerbitzu hori estaldura gisa kontrata daiteke gainerako modalitateetan. Esku-trebea Plus zerbitzuak 3 orduko eskulana hartzen du, urtean 2 aldiz, zure etxeko lan eta konponketa txikietarako. 

Estaldura berri gisa, Defentsa juridikoa etxebizitzaren legez kontrako okupazioan nabarmentzen dugu; zure etxebizitza berreskuratzeko prozedura adiskidetsu eta judizial batean aseguratuaren defentsa-gastuak estaltzen ditu, hain egoera desatsegina gertatzen bazaizu.

Ildo beretik, etxebizitzak bandalismozko edo asmo txarreko ekintzak izan baditu okupen erruagatik, estaldura berri horrek bere gain hartuko ditu legez kanpoko okupazioak eragindako kalteak.

Azkenik, bigarren egoitzetarako “Ez bidaiatu” zerbitzua estreinatu dugu. Ezbeharra gertatuz gero, giltzen bidalketa kudeatzeaz arduratuko gara, gremioak sartu ahal izateko eta, horrela, zu bertara joan beharrik ez izateko.

Guretzat garrantzitsuena da zu seguru eta babestua senti zaitezen lortzea. Kontsultatu gure estaldura guztiak gure webgunean.

. 

The post Lagun Aron Etxeko Asegurua hobetu dugu appeared first on Blog de actualidad.

Automobil-aseguruen sektorean mito asko daude, eta badirudi aipatutako hori dela hedatuenetako bat. Hala ere, badaude karrozeriaren kolorea errepideko ezbeharrekin erlazionatzen duten ikerketak. Adibidez, Zeelanda Berriko The Health Research Council-ek 2003an egindako ikerketa baten arabera, tonu iluneko ibilgailuek (esaterako, beltzek edo berdeek) harremana zuten ezbeharretan zauritu larriak izateko aukera handiagoarekin. Bestalde, azterketa batzuek diotenez, tonu griseko ibilgailuek arrisku handiagoa dute, nekezago ikusten direlako. Hala ere, gaur egun baieztapen horrek pisua galdu du, ibilgailu berrietan eguneko argia nahitaezkoa delako.

Arrazoibide nagusia da kolore batzuk beste batzuk baino errazago ikusten direla, batez ere gauez. Hala eta guztiz ere, gaur egun modelo guztiek argi bereziak dituzte eta beste elementu batzuk ere badituzte, betiere ikusgaiak izan gaitezen, errepidearen baldintzak edozein direla ere.

Hala ere, mito hau eraikitzen lagundu duten arrazoietako bat da istripu gehien dituzten gidariak gazteenak direla, esperientziarik eza dela-eta. Eta, aldi berean, sektore honen kolore gustukoenak beltza eta gorria dira. Horregatik, esan ohi da karrozeria gorri edo beltzak direla ezbehar-tasarik handiena dutenak, baina, gidari zuhur eta esperientziadun baten eskuetan, istripu bat izateko aukera berberak izaten dira auto beltz batean edo auto zuri edo urdin batean.

Eta prezioan?

Hemen beste mito bat dugu berriro aurrean; izan ere, zure autoko karrozeriarako aukeratzen duzun koloreak ez baitu eraginik izango aseguruaren prezioan. Hala ere, ñabardura txiki bat dago hemen.

Aseguruaren prezioa zehazteko orduan hainbat faktore hartzen dira kontuan, hala nola gidariaren adina, esperientzia, bizilekua eta, autoari dagokionez, marka, modeloa, motorraren potentzia edo ibilgailuaren prezioa.

Hala ere, zure ibilgailurako pintura metalizatua aukeratzen baduzu, estra gisa hartu daiteke eta beharbada polizaren prezioa handitzea eragingo du. Horren arrazoia da antzina ez zegoela ibilgailuentzako hainbeste kolore-barietate, eta kolore-paleta hori handitu egin zen tonu metalizatuak iritsi zirenean, eta, esan bezala, estra gisa kontabilizatzen dira. Hori bai, zure auto berriarentzako tonu matea aukeratzen baduzu, kontuan izan kolore horiek aseguruaren prima handitu dezaketela, konpontzeko garestiagoak baitira.

Beraz, ez izan beldurrik zure hurrengo ibilgailurako kolore bat edo bestea aukeratzeko, eta gogoan izan, istripu bat izateko aukerak murrizteko, garrantzitsuena kontuz zirkulatzea dela.

The post Ba al du eraginik nire autoaren koloreak aseguruaren prezioan? appeared first on Blog de actualidad.

Hala ere, ez dugu ahaztu behar beste garraiobide bat dela eta bide-segurtasuneko arauak bete behar ditugula, beste edozein ibilgailuk bezala.

Lehenik eta behin, kontuan izan behar duguna da inoiz ezin garela atera kasko homologaturik gabe bizikletan ibiltzera. Kaskoak neurri egokikoa izan behar du eta ondo jarrita egon behar du. Bigarrenik, argia eta elementu islatzaileak, ikusten eta gainerako gidariak zu ikusten lagunduko dizutenak. Saiatu beti egunean zehar ateratzen, eguzkia ateratzeko eta sartzeko uneak saihestuz.Gainera, hona hemen kontuan izan beharko zenituzkeen oinarrizko segurtasun-gomendio batzuk:

• Bizikleta behar bezala doitu: Zure ibilbidea hasi aurretik, garrantzitsua da ibilbideko osagaiak baldintza optimoetan egotea. Izan ere, frenoei eta horien funtzionamenduari, pneumatikoen presioari eta egoerari eta eskulekuko torlojuei erreparatu behar diezu. Gainera, komeni da bizikletaren azterketa osoa egitea noizean behin.

• Jarri kaskoa: Gogoratu homologatutako kaskoa eramatea nahitaezkoa dela hiriarteko bideetan bizikletaz ibiltzeko. Kontuan izan aireztapen eta doitze ona eman behar dizula, erosotasuna eta segurtasuna bermatzeko. Kontuan izan, gainera, denborarekin hondatzen den osagarri bat dela, eta, beraz, kolpe handiren bat izaten duen bakoitzean edo bost urte egindakoan aldatzea komeni dela.

• Argiztapena: Lehen aipatu dugu zer garrantzitsua den bizikletaz zirkulatzen ari zarenean zu ikustea, baina bizikletentzako argiak funtsezko osagarriak dira ikuspena areagotzeko. Ikus zaitzaten, komenigarria eta nahitaezkoa da atzealdeko argi gorri bat eramatea beti.

Gainera, gogoan izan nahitaezkoa dela argi zuria eramatea bizikletaren aurrealdean, eta beste gorri bat atzealdean. Era berean, komeni da xehetasun islatzaileak dituzten arropak erabiltzea, zure presentzia handitzeko eta distantzia luzean ikusi ahal izan zaitzaten.

• Ahaztu telefono mugikorraz: Badakigu gero eta zailagoa dela smartphonea atzean uztea, eta izugarri gustatzen zaigu gure bideak lagunekin partekatzea edo sare sozialetarako bideoak eta argazkiak egitea. Hala ere, badakigu zure bizikleta gidatzen ari zaren bitartean mugikorra erabiltzea oso arriskutsua dela zuretzat eta gainerako gidarientzat, eta, gainera, zehapen ekonomiko bat jaso dezakezula.

• Doitu bidera: Galtzadan bizikleta-bideren bat badago, handik zirkulatu behar duzu, eta erabilgarri ez badago, bazterbidetik zirkulatu behar duzu, edo galtzadaren eskuinaldera ahalik eta gehien hurbildu, abiadura handiagoan zirkulatzen ari diren ibilgailuek errazago aurreratzeko. Bizikletan jende gehiagorekin ibiltzen bazara, paraleloan bi lagun bakarrik joan zaitezkete, beti galtzadaren eskuinaldera ondo doituta.

• Errespetatu zirkulazio-seinaleak: Gogoan izan bizikletara igotzen zaren unetik, galtzadan ibilgailu bat gehiago zarela, eta, beraz, errespetatu behar dituzula zirkulazio-seinaleak, zure ibilgailua gidatzen duzunean bezalaxe. 
• Seinaleztatu eta aurreratu zure mugimenduak: Ondo dakizun bezala, bizikletek ez dute keinukaririk; beraz, zure besoak erabili beharko dituzu beste gidariei mugimenduen berri emateko.

Hauek dira aholkuetako batzuk, baina mantentze- eta segurtasun-gomendio gehiago ikusi nahi izanez gero, DGTren webgunea kontsulta dezakezu. 

Laburbilduz, bizikleta garraiobide ideala da, egiten duzun ariketa fisikoagatik ez ezik, baita garraio ekologikoa delako eta ingurumena errespetatzen duelako ere. Anima zaitez erabiltzera! 

The post Bizikletaz ibiltzeko segurtasun aholkuak appeared first on Blog de actualidad.

Gaur egun hain ezaguna da tresna, non gidatzeko azterketen testetan eta gidatzeko beste edozein elementuren testetan ere agertzen baita. Baina kontuz! Ezin dugu ahaztu telefono mugikorrak izaten direla gidatzerakoan arreta-galtze gehien eragiten dituztenak eta trafiko-istripuen kausa nagusietako bat, Trafikoko Zuzendaritza Nagusiaren (DGT) arabera. Datu horiek ez diote erreferentzia egiten mugikorra deitzeko, mezuak bidaltzeko edo sare sozialetarako soilik erabiltzeari, gidatzen ari garen bitartean GPSa erabiltzeagatiko arreta-galerak ere sartzen dira.

Isunik jar al diezadakete GPSa erabiltzeagatik?

Trafikoari eta Bide Segurtasunari buruzko Legearen erreforma berriak alderdi garrantzitsuak aldatu ditu zirkulazioaren erregulazioan eta bide-segurtasuneko arauetan, baina arau-hauste jakin batzuei dagozkien zigorrak ere gogortu ditu. Aldaketa-prozesu honetan, protagonistak izan dira bolantearen aurrean gaudenean arreta galtzea dakarten arau-hausteak, eta, beraz, gehitu egiten dira zirkulazio-istripu bat izateko aukerak. 

Gidatzen ari garen bitartean, GPSa erabiltzea debekatutako eta zigortutako praktika da, baita gailu mugikorrekin edo beste sistema batzuekin eskuz gidatzea ere, gidatzeko beharrezkoa den etengabeko kontzentrazioa murrizten baitute.

Horregatik, Trafikoari eta Bide Segurtasunari buruzko Legean, gidatzean GPSa erabiltzea arau-hauste larritzat jotzen da, eta 200 euroko isunarekin eta gidabaimenaren 3 puntuko galerarekin zehatuko da. 

Baina GPSa erabiltzeak beste egoera-mota batzuengatiko zehapenak ere ekar ditzake:

• Nabigatzailearen jarraibideei jarraituz, ausarkeriazko gidatzeren batera eraman gaitzake, hala nola bat-bateko biraketak edo ustekabeak erantzunik ez egoteagatik, kontrako noranzkoko itzulerak, aurrerapen arriskutsuak, gehiegizko abiadura, etab., zirkulazio-isun bat eragiten dutenak.
• GPSa gidariaren ikuspena oztopatzen duen eremu batean jartzeak 200 €-ko isuna ekarriko du puntu-galerarik gabe.
• Radarren inhibitzaile integratua duen GPS bat eramatea delitutzat joko da, eta 6.000 euroko isuna eta 6 puntuko demeritua ekarriko du.

Arau berriak hitzez hitz dio debekatuta dagoela «gidatzen den bitartean eskuarekin eutsita, edo kaskoaren eta erabiltzailearen buruaren artean doituta mantenduz erabiltzea telefonia mugikorreko gailuak, aurrekoak ez bezalako baldintzetan telefonia mugikorreko gailuak eskuz erabiliz gidatzea (esaldi honek zabaldu egiten ditu isuna jar daitezkeen kasuak), eskuz nabigatzaileak edo beste edozein komunikazio-sistema erabiliz gidatzea, eta ibilgailuetan radarrak edo zinemometroak detektatzeko mekanismoak eramatea». 

Ondorioz, GPS gailuak erabiltzen jarrai dezakegu, ibilgailuan integratuta badaude eta eskuak erabiltzea beharrezkoa ez bada.

The post Ibilgailua martxan dagoela GPSa erabil dezaket? appeared first on Blog de actualidad.

Lehen urratsak

Auto-istripuren bat gertatuz gero, funtsezkoa da lasai egotea. Lehen urratsak dira istripuaren zona seinaleztatzea eta inplikatutako guztiak ondo daudela ziurtatzea; hala egon ezean, larrialdi-zerbitzuei abisatzea.

Gorabehera arin bat bada eta denok ondo bazaudete, Istripu-adierazpen adiskidetsua ateratzeko unea da. Ibilgailuak gidatzen ari zinetenok dokumentu bakar bat beteko duzue bion datuekin. Garrantzitsua da kontrako gidariarekin batera betetzea, gertakariek bat etorri behar baitute istripu-adierazpenari balioa emateko. Adostasunik lortzen ez bada, agintariei deitu beharko diezue betetzen eta/edo atestatua egiten laguntzeko.

Lagun Aroren auto-aseguru bat badaukazu, “Autoentzako gida erabilgarria” (PDF) dokumentuan aurkituko duzu informazioa.

Oso garrantzitsua da ”Gertatutako modua” laukiak behar bezala betetzea. Lauki hori aurkitzen ez bada, kaleen izenak, ibilgailuek zuten norabidea, lehendik dauden zirkulazio seinaleak eta errepideen egoera adierazten dituen krokisaren laukia gomendatzen dugu. Alde horretatik, ezinbesteko datuak daude, hala nola data, lekua eta inplikatutako ibilgailuen matrikula. Era berean, ezbeharraren kudeaketa arintzeko bestelako informazioa ere badago, hala nola harremanetarako telefonoak, ibilgailuaren marka eta modeloa edo aseguru-etxea eta poliza-zenbakia.

 Beharrezkoa al da adierazpen adiskidetsua sinatzea?

 Ados bazaude, bai. Izan ere, puntu honetan nahasmen handia dago, baina egia da adierazpen adiskidetsua behar bezala betetzeak ezbeharraren kudeaketa bizkortzen duela kasu gehienetan.

Adierazpen adiskidetsua sinatu behar ez duzun une bakarra da bertan adierazten diren gertakariekin ados ez zaudenean. Kasu horretan, Trafikoko Agintaritzetara deitzea gomendatzen da, haiek argitu dezaten istripuaren erantzukizuna.

Begi bistakoa badirudi ere, ez zaitez saiatu daturen bat aldatzen istripu-adierazpena sinatu ondoren, hori zure kontra erabil baitaiteke gero. Aseguratuak ezin badu adierazpen adiskidetsua sinatu, bere izenean nork sinatzen duen eta pertsona horrek zergatik sinatzen duen adierazi behar da.

Adierazpen adiskidetsuaren atzealdea ez dago istripuaren unean bertan sinatu beharrik. Ondoren bete ahal izango duzu, eta norbaitek lesioak izan dituen, agintariek parte hartu duten eta abar adierazi. Ondoren, adierazpen adiskidetsua aseguru-etxeari bidali behar diozu, istripua gertatu denetik 7 eguneko epean gehienez.

Adierazpen adiskidetsuak zure mugikorretik ere bete ditzakezu

 Gaur egun posible da, Androiderako eta iOSerako erabilgarri dagoen Declaración iDEA app-ari esker.

Declaración iDEA app-a (gauza bera da, baina modu elektronikoan) 3.1 bertsioan dago jada, eta doan deskarga daiteke bai iOSen eta bai Androiden.

App horrek ezbeharra izapidetzea errazten du, eta informazioa zure aseguru-etxeari helarazteko modu arin eta eraginkorra da. Mugikorraren pantailan azaltzen diren menuek aukera emango dizute ukituen datuak, kaltetutako ibilgailuaren zatiak edo istripuari buruzko azalpenak sartzeko.

Paperean sinatu behar den bezala, app-ean ezinbestekoa da istripu-adierazpena onartzea. Kasu horretan, gure aholkua da urrats hori gertatutako unean bertan egitea.

Lagun Aron hasieratik bertatik batu ginen UNESPAren ekimen honekin; TIREAk (aseguruen sektorearen hornitzaile teknologikoak) garatu du, eta Espainian automobil-arloan jarduten duten aseguru-entitate guztien eskura dago. 

Laguntza behar baduzu edo gorabehera baten berri eman nahi badiguzu, gure doako telefonoan (900 38 08 38) edo gure webgunearen bidez artatuko zaitugu.

The post Autoarekin gorabehera baten ondoren jardutea: Nola bete adierazpen adiskidetsua? appeared first on Blog de actualidad.

Zer da aparkatzea?

Aparkatzeak “ibilgailua denbora batez gelditzea” esan nahi du, eta horretarako beharrezkoa da egiaztatzea aparkatzea debekatzeko seinalerik ez dagoela eta Zirkulazioko Erregelamendu Orokorra jarraitzea, beste edozein ibilgailuren kasuan bezala.  Alde horretatik, ibilgailu bat aparkatutakotzat jotzen da horretarako mugatutako espazio bat okupatzen ari denean, baina leku horren mugetatik irten gabe. Beraz, logikoki, ezin izango zara autokarabanarekin gelditu bigarren ilaran, kurba batean edo pasabide batean, bestelako ibilgailuekin bezalaxe.

Non eman dezaket gaua?

Gaua emateak esan nahi du “gauez aparkatzea eta lo egitea zure ibilgailuaren edo autokarabanaren barruan”. Behar bezala aparkatu baduzu eta lo egin nahi duzun zonan dauden lege-araudi guztiak betetzen badituzu, gaua eman ahal izango duzu bertan. Kontuan izan debekatuta dagoela itsasotik gertu edo naturagune babestuen barruan aparkatzea; gune bakoitzeko seinaleei erreparatu beharko diezu. Gero eta zona pribatu gehiago daude gure autokarabanan kanpatuta gaua eman ahal izateko. Hainbat webgunetan aurkituko duzu informazio hori, eta ezinbestekoa da bidaia prestatzeko. Adibide on bat aurkitu dugu zure karabanarekin lo egiteko areekin, baina seguru Interneten askoz gehiago aurkituko dituzula!  

Kanpatzea vs. gaua ematea

Ia edozein lekutan eman daiteke gaua, baina ez da kanpatzearen gauza bera, toldo bat edo kanpin-etxe bat muntatzea eta kanpineko mahaiak edo aulkiak ateratzea eskatzen baitu horrek. Kanpinerako eremu esklusiboetan bakarrik kanpa daiteke, publikoak nahiz pribatuak izan.

Iaz, Kanpineko Enpresarien Espainiako Federazioak (FEEC) legearen erreforma eskatu zuen kanpin-eremuetatik kanpo karabanan gaua ematea debekatzeko, baina legea oraindik ez da aldatu. Federazioaren proposamenaren arabera, kanpineko enpresariek kudeatutako eremuak erabili beharko lirateke karabana, autokarabana eta camper furgonetetan gaua emateko. Oraingoz, aparkatzea baimenduta dagoen lekuetan gaua eman ahal izango duzu.

Gurpilen gainean oporretara joateko asmoa duzu? Prestatu udako opor-bidaia autokarabanan, eta ezagutu horrelako abenturetarako helmugarik onenak.

The post Nik nahi dudan lekuan lo egin dezaket karabanarekin? appeared first on Blog de actualidad.

 Ahal den guztietan, karga maletategira

Ibilgailuaren karga maletategian kargatu behar da ahal bada, beti goiko erretilua errespetatuz. Leku gehiago behar baduzu, ken daiteke, baina gogoan izan ez dela gomendatzen gidariaren atzealdeko ikuspegia buxatuta dagoela gidatzea; edonola ere, hala eginez gero, nahitaezkoa da ezkerreko ispilu bat edukitzea. Gainera, erretilua kenduz gero, kargari ondo eutsi behar zaio, istripua edo bat-bateko maniobra bat gertatuz gero karga oso azkar ateratzea saihesteko. Horregatik, gomendioetako bat da atzeko eserlekuaren eta maletategiaren artean banatze-sare bat erabiltzea.

Gehien pisatzen duten objektuak, tamaina edozein dela ere, maletategiaren hondoan jarri behar dira; izan ere, 14. artikuluaren arabera, karga “ibilgailuaren egonkortasuna arriskuan jarriko ez duen moduan” banatu behar da. 

Ibilgailuaren barruko kargaren kasua

Beti ez da posible izaten dena maletategian kargatzea: batzuetan, objektu handiagoak bidaiari-tokiaren barruan kargatu behar izaten ditugu. Kasu honetan, karga leku seguru eta babestu batean jarri behar da, bat-bateko maniobra edo istripua gertatuz gero arriskutsua izan ez dadin. Kargak ez du inoiz ibilgailuaren egonkortasuna arriskuan jarri behar, eta barruan ondo banatuta egon behar du. Era berean, ez du zaratarik edo eragozpenik sortu behar, eta ez du ibilgailua gidatzea zaildu behar.

Azken aukera gisa, karga ibilgailuaren kanpoaldean 

Azken baliabide gisa, karga ibilgailuaren kanpoaldean eraman daiteke, normalean sabaian edo ibilgailuaren atzealdean. Kasu horretan, kontuan izan behar da kargak ezin dituela estali ibilgailuaren argiak zein matrikula, eta ezin dela irten ibilgailuaren planotik, inguruabar eta baldintza berezietan izan ezik. Gainera, kargak erabat lotuta egon behar du, erortzea eta errepidearen beste erabiltzaile batzuentzat arriskutsua izatea saihesteko.

Salgaiak garraiatzeko ez diren ibilgailuetan, araudiak ezartzen du karga atzealdetik % 10 arte irten daitekeela, edo % 15 arte zatitu ezin bada. Nolanahi ere, irtenez gero, gidariek V-20 seinale batekin seinaleztatu behar dute, gainerako gidari eta erabiltzaileak ohartarazteko.

Zenbatekoa da karga gaizki eramateagatiko isuna? 

Trafikoari, Ibilgailu Motordunen Zirkulazioari eta Bide Segurtasunari buruzko Legearen arabera, arau-hauste larria da “ibilgailu bat gidatzea karga gaizki egokituta dagoela edota erortzeko arriskua duela”. Beraz, isuna 200 €-koa izango da. 30

Ba al du eraginik aseguruan karga gaizki eramateak? 

Horrez gain, automobil-aseguruek ez dituzte estaltzen ez-betetzeetatik eratorritako ondorioak indarrean dagoen legeria betetzen ez denean pisuari, kargaren neurriari eta garraiatzen den moduari dagokienez; horiek izaten dira, hain zuzen ere, istripu-arrazoi erabakigarriak.

The post Zure autoko kargak eta objektuak kudeatzeko aholkuak appeared first on Blog de actualidad.

Mugikorraren erabilera biderkatu egin da azken urteotan, isunak 200 euro arte igo diren arren eta gidabaimenaren sei puntu kendu arren. 

Esku libreen sistema erabiltzea nahitaezkoa da, baina erabiltzen denean arreta murrizten da. Ikerketek erakutsi dute esku libreen sistemarekin hitz egin eta 3 minutu igaro ondoren gidariek seinaleak hautemateari uzten diotela % 40an, batez besteko abiadura % 12 murrizten dela eta erreakzio-denbora handitzen dela.

Arreta-galeren ondorioz errepideari ez zaio ematen behar adinako arretarik, eta arreta-galera horrek ibilgailuak kontrola galtzea eragin dezake. DGTk 3 adibide hauek jarri ditu:

• WhatsApp-a bidaltzen baduzu, 20 segundoko tartea hartuko dizu, eta tarte horretan 600 metro egingo dituzu.
• GPSa erabiltzen baduzu, 14 segundo emango dituzu, eta 466 metro egingo dituzu tarte horretan.
• Dei bati erantzutean, 8 segundo erabiliko dituzu, eta 266 metro egingo dituzu.

Zifra horiek gorabehera, espainiarren heren batek baino gehiagok onartu zuen deiren bat egin edo mezuren bat irakurri zein idatzi izana azken urtean gidatzen zuen bitartean. Izan ere, DGTk dio telefono mugikor bat erabiltzea edatea eta gidatzea bezain arriskutsua izan daitekeela. Horregatik, telefonoa larrialdietan bakarrik erabiltzea gomendatzen da, autoa errepidean aparkatuta dagoela, eta “gidari modua” aktibatzea gidatzen den bitartean posible bada. Gainera, GPSa bidaia hasi aurretik programatzea komeni da; hura manipulatu behar izanez gero, onena gelditzea da, eta martxan inoiz ez manipulatzea.

Alde horretatik, arreta-galerak saihesteko aukera ematen diguten hainbat aplikazio daude. Horietako bat Mutting da: kontaktu-zerrendan sartzen da, eta jakinarazten digu kontaktatu nahi dugun pertsona erabilgarri dagoela (argi berdea), gidatzen ari dela (gorria) edo aplikazioa ez daukala (beltza). Geolokalizazio-sistemaren bidez, Mutting-ek detektatuko du pertsona horrek orduko 16 kilometroko abiadura gainditu ote duen, eta, horrela bada, gidatzen ari dela jakinarazten du eta mezu bat erakusten du.

Gidatu bitartean mugikorra erabiltzen duen gidariaren batez besteko profila 

18 eta 24 urte bitarteko gidari gazteek hiriguneetako semaforoetan eta auto-ilaretan erabiltzen dute batez ere mugikorra, eta “errepidean erabiltzea segurua” dela iruditzen zaienean. Murtzia, Galizia eta Madril dira telefono mugikorraren “mendeko” gidari gehien dituzten autonomia-erkidegoak; Asturias, Extremadura eta Errioxa dira, berriz, mugikorraren “mendeko” gidari gutxien dituzten autonomia-erkidegoak. 

Oro har, ez dirudi espainiarrek argi dutenik gidatzen ari direnean mugikorra erabiltzeak dakarren arriskua. Izan ere, gidarien % 38k onartzen du mugikorra esku librerik gabe hitz egiteko erabiltzen dutela, eta % 9ren iritziz mugikorra erabiltzeak “ez dio gidatzeari eragiten”. Are gehiago, ia % 6k uste du telefono mugikorraren erabilera desegokiarekin lotutako istripuen kopurua ez dela egia. Errealitatea, ordea, nahiko desberdina da: arreta galduta gidatzea da istripu hilgarrien arrazoi nagusia, eta kalkulatzen da errepidean gertatutako 390 heriotza telefono mugikorrak erabiltzearen ondoriozkoak direla.

ESRA proiektuaren arabera (Errepideko Erabiltzaileen Jarrerei buruzko Inkesta), espainiarren % 56k adierazten du mugikorra esku libreekin erabili duela azken urtean gidatzen ari den bitartean hitz egiteko, eta % 35ek onartzen du esku librerik gabe erabili izana. Era berean, Espainiako gidarien % 36k onartu zuen azken urtean testu-mezua irakurri izana gidatzen ari zen bitartean, eta % 26k testu-mezua bidali izana onartu zuen.

Mugikorraz gain, soinua erreproduzitzeko beste aparatu batzuei lotutako kaskoak edo aurikularrak erabiltzea ere debekatuta dago, eta zigorrak ere ekar ditzake, gidatzean arreta-galerak eragiten baitituzte.

Azkenik, hona hemen zehatu daitezkeen eta hain ezagunak ez diren beste ekintza batzuk: irakurtzea, objektuak bilatzea, gidatu bitartean jatea edo ibilgailuko gainerako bidaiariekin jarduteagatik arreta galtzea, DGTk jakinarazitakoaren arabera.  

The post Mugikorra eta gidatzea: bateragarriak al dira? appeared first on Blog de actualidad.